Anino sa kulto

Gula 14

“Wala pa gyud, Gaw,” tul-id nga tubag ni Belen. “Si Major Campo, ang hepe sa kapolisan sa atong lungsod, padayon pang naghimo’g imbestigasyon.”

Kahilom. Si Carlo mipaunlod sa iyang kaisipan ngadto sa halawom nga pagpalandong. Unya nahinumdom siya sa misteryosong kaaway nga iyang gikasulti sa telepono dili pa lang dugay. Mikulismaot ang iyang nawong. Ang kayugot ug kasilag inanay nga mibulto sa iyang panagway.

Karon natahap si Carlo nga ang misteryoso niyang kaaway may kalabotan sa nahitabo sa iyang mga ginikanan. Tinuod gayod diay ang gisulti niini nga atua kini sa Bohol. Nangalit kini samtang ania siya sa kaulohan ug walay makapanalipod sa iyang mga ginikanan. Sa pagtawag niini kaniya kaganina, may gihimo na diay kining daotan sa iyang mga ginikanan.

“Unsay imong hukom karon, Gaw?” sukot ni Belen pagkataudtaod nga daw mipahunat kaniya.

“Mopauli ko diha,” dali niyang hukom. “Paningkamotan ko nga mahidangat diha karon gyung adlawa.”

Human sa panagsulti nila ni Belen sa long distance, nangandam dayon si Carlo Guieb sa iyang kaugalingon. Nanghipos siya sa iyang mga butang. Human makapanghipos sa iyang mga dad-onon, mibiya gilayon siya sa apartment ug misakay og taksi paingon ngadto sa buhatan sa Vanguard Intelligence and Detective Agency. Mananghid siya sa iyang labaw nga mopauli siya sa Bohol.

Samtang nagsakay siya sa taksi nga naapiki sa kahuot sa trapiko, ang hunahuna ni Carlo didto ra sa Bohol. Naglamugdong sa kasubo ang iyang panagway. Daw gikusi ang iyang balatian samtang nagpalandong sa nahitabo sa iyang mga ginikanan didto sa probinsiya. -- Sumpayan pa