Sugyot alang sa CITOM

Domingo. Alas onse sa buntag. Gi-U-turn nako among sakyanan sa tungod sa skywalk sa Gaisano Country Mall. Kita kaayo ang karatula nga nag-ingon No U-turn. Kun ako’y pabut-on, adto ko U-turn sa ilawom sa fly over sa may Foodland. Aron way traffic violation. Apan ang pasahera may nagbuot. Di ko kasupak. Kay ako mang kumander (kapikas).

Gikan mi sa Mandag-um, Badian. Namista mi didto. Sabado pa sa hapon, didto na mi. Giimbitar mi sa akong manghod nga si Efren. Unya pagbiya namo humag pamahaw ganihang buntag aron mamauli sa Talamban, may gipamalihog si Efren. Duna siya’y padad-ag sud-an sa Sitio Baca nga suod niyang higala nga wa katambong sa iyang hikay. Balig tulo ka Tupperware nga gisulod sa plastic bag.

Gisultihan ko na daan akong kumander kun asa ko mo-U-turn. "Ah, Domingo bitaw ron, Allan! Way trapik. Wa say mananakop!' ni Norelyn nga tupad nako sa front seat sa among Toyota Corolla nga abuhon. Sabado’g Domingo tuod. Daghan kong makit-ang mga sakyanang mo-U-turn diha. Way manakop.

Apan paghuman gyud nakog U-turn, igong nibalik ang sakyanan padulong sa Sitio Baca nasigpatan dayon nako ang multicab nga asul ug puti ang bulok. May tatak CITOM nga nag-parking sa habig sa Gaisano Country Mall. "Patay!" nakatuaw ko sa hilom.

Pagtungod gyud nako sa multicab, may nipara dayon nga Traffic Enforcer. Nilingi dayon ko sa akong kapikas. Wa nalang ko magtingog. Aron way gubot. Apan naa’s akong hunahuna akong igsusulti. "Giingnan ta bitaw ka!"

Gipadaplin nako ang sakyanan. Ug giablihan ang bintana sa akong wala. "Maayong buntag, Sir" sa enforcer sa matinahuron nga tono. But-anon siya’g hitsura. "Pasayloa lang ko, Sir. Domingo man god ron. Wa kaayo’y trapik. Abi sab nako’g way mananakop" nako pa. Nakatawa ang enforcer.

"Sa ato pa, mutahod lang ta’s balaod kun may manakop" sa enforcer.

"Patan-awa lang ko’s imong lisensiya" dugang niya.

Nikuot ko’s akong pitaka sa tuong luyong bulsa sa akong maong mga purol. Gikuha ko akong lisensiya ug gitunol sa enforcer.

"Isyuha ta lang ka’g citation" niya pa.

"Pila man kahay multa ana, sir?" nako pa.

"Wa ra" tubag niya. Nikuha sa stub sa mga resibo gikan sa iyang bulsa ug nagsugod og suwat. Unya nidalikyat dayog tunol nako si Norelyn og tibuok dos sintos pesos nga papel de banko. Iyang ipahatag sa enforcer. Gidawat nako.

"Puwede’g anha na lang namo ihatag among para multa sir?" nako pa nga nagtunol sa papel de banko sa enforcer.

"Ayaw ana sir. Puwede baya tika sa arestahon. Kay attempted bribery nang imong gibuhat" pintok ang tono sa enforcer.

Napingi na sab ko. Lisod ning wa tay kaugalingong panghunahuna. Agad lang pirmi sa kumander.

Gitunol sa enforcer og balik nako ang lisensiya ug papel nga asul nga gipirmahan niya. "Salamat Sir" nako pa. Gidawat nako. Nitalikod ang enforcer.

"Puwede’g ang No U-turn sign buntanga’g Monday thru Friday? Aron Sabado’g Domingo puwede maka-U turn?" ni Norelyn nipalakbit og dalidali.

"Pagsuwat mo sa hepe sa CITOM sa inyong sugyot. Kay working days ra man tuod nga daghang sakyanang mangagi dinhi. Mas maayo pa mosugyot mo. Kay sa mosoborno!" sa enforcer nga naglingi namo.

Sukad adto, nakahukom ko nga isip drayber, ako nay magbuot asa nako iagi ang gimanehong sakyanan. (Katapusan)