Anino sa kulto

Gula 13

Naigking si Carlo dihang mibagting na usab ang telepono. Nahalingi siya ngadto sa nahimutangan niini. Nagpadayon kini pagbagting. Miduol siya sa talad ug gipunit ang awditibo. Wala siya’y ideya kun kinsay nanawag.

“Hello...?” niya pa.

“H-hello,” tingog sa usa ka babaye ang nadungog ni Carlo didto sa pikas tumoy. “M-mahimong ikasulti si Carlo Guieb?”

“Speaking,” niya pa. “Kinsa ni?”

“Gaw,” matud sa babaye. “Si Belen kini. Maayo kay nakontak ta na ka. Kagahapon pa kong nagsige’g panawag nimo didto sa inyong buhatan.”

“Ngano man diay. Gaw?” Sukit ni Carlo. “May problema ba?”

“Dako kaayong problema, Gaw,” ni Belen pa.

“U-unsa man kana?” ni Carlo nga nagpanikad na nga masayod sa problema nga giingon ni Belen.

Dugay nga nakasulti si Belen. Namatikdan ni Carlo nga daw naglisod kini pagbungat sa igsusulti niini kaniya. Ug dihang nakatug-an na gayod si Belen, nakugang pag-ayo si Carlo.

“Mao kana, Gaw,” matud ni Belen. “Girakrakan ang inyong balay kagahapon sa kaadlawon ug naangin ang kinabuhi nilang Tiyo Paulo ug Tiya Rita.”

“D-dili,” mao ray nalitok ni Carlo. Namatikdan niya nga daw gikumot og tunokon nga mga kamot ang iyang dughan. Mora’g dihay bahin sa iyang balatian nga natukbil ug namiaw sa iyang mga mata ang mga lusok sa luha.

Mibati si Carlo og dili tiaw nga kaluoy sa iyang mga ginikanan. Unsay ilang sala nga gitinguha man ang ilang kinabuhi? Pagkawalay balatian sa naghimo sa ingon. Hayop! Banyaga!

“K-kinsay naghimo niini, Gaw?” nangutana si Carlo kang Belen pagkilab sa pipila ka gutling. “Nadakpan na ba ang mga kriminal?” -- Sumpayan pa