Sa sulod sa biyente ka tuig wala gayud nakadungog si Janine og maanindot nga pulong o pagbatyag man lamang og importansya alang kaniya gikan sa iyang inahan. Gibuhat niya ang tanan aron dayegon pero ang iyang madawat niini pirme kay ang maong pulong "unya unsaon man kana".
Sa paglabay sa mga tuig migradwar gayod si Janine nga may dako ug maanindot nga dungog sa katawhan. May mga medalya nga nadawat tungod sa iyang pagpaningkamot. Tinuod man nga mitambong ang iyang inahan sa maong gradwasyon apan dili kini ang mitaod sa iyang mga medalya kun dili ang iyang apohan.
Nasakitan siya sa gibuhat sa iyang inahan ug mihilak sa hilom. Gitutukan niya kini og maayo daw gipangutana "Ngano kaman mama, wala ka ba malipay sa akong naabot karon?".
"Gipasigarbo ko ikaw anak, gipasigarbo ko ikaw," tubag sa iyang inahan nga mitulo ang luha.
"Wala ko kana mabati diha kanimo sa paglabay sa mga tuig Ma!!!," matud ni Janine.
"Pasaylo-a ko inday, gibuhat ko kini alang ra pud sa imong kaayuhan," sulti sa iyang inahan.
"Alang ug para kanako? Ang unsa? Huh! Ang pagtrato mo kanako nga sama sa "butang nga walay bili"? Wala kay pagtagad kanako! susama ka sa walay ayo nga pagkaginikanan. Ma, wala ako manginahanglan sa imong pagsalikway, ang akong gipangita kay ang imong gugma ug ang pagpasigarbo mo kanako nga imong anak pero unsa ang imong gibuhat!!! Imong gipakita nga murag wala akoy inahan, wala ikaw sa akong atubangan," matud pa ni Janice.
Misulay pa pagpasabot ang iyang inahan apan daklit lang kining nangluspad ug nakuyapan. Gidala kini sa hospital ug nasuta nga ang iyang inahan kay hapit na mamatay tungod sa sakit niining walay kaayuhan.
Nihilak si Janine og maayo daw gibasol niya ang iyang kaugalingon sa nahitabo. Gigakos siya pag-ayo sa iyang inahan.
"Ayaw na paghilak anak, usa ka sa labing importanteng butang sa akong kinabuhi, I never rejected you. Mahal ko ikaw anak ko. Gibuhat ko nga magpakabuta bungol sa imong atubangan kay aron sa akong kamatayon dili ka masakitan tungod kay wala mo mabati nga anaa ra ako sa imong kiliran. Gusto kong mubarog ka nga isog ug lig-on," matud pa sa inahan.
"Pero Ma, imo unta akong gisulti-an sa kamatuoran kay aduna akoy katungod nga makahibalo, imo kong anak," tubag ni Janine.
Ssssshhhhh! Mihalok ang iyang inahan kaniya ug mihunghong "I love you, anak and I'm so proud of you."
Paghuman og sulti niadtong mga pulong, mi-straight na ang linya sa monitor. Gikuha na gayod ang kinabuhi sa iyang inahan. Wala na siya'y nahimo, kutob nalang sa paghilak ug paggakos sa iyang mama. Iyang nahinuktukan nga dili gayud diay siya usa ka "butang nga walay bili" kun dili usa siya sa labing mahal nga alahas sa kinabuhi niini. (Kataposan)