Anino sa kulto

GULA 11

 CEBU, Philippines - “K-kinsa kini?” Sukit ni Carlo sa nanawag.

Walay pulong nga gilibkas ang tawo sa pikas tumoy sa telepono. Ang nabati ni Carlo mao lang gihapon ang hinay nga kagiki. Unya ang kagiki natibuok ngadto sa usa ka makahahadlok nga bahakhak. Unya, kalit lang usab kining nahilom.

“Kinsa ka?” ni Carlo nga giabot nag kalagot. “Pagpaila sa imong kaugalingon.”

“Kumosta ka, Mr. Guieb?” mitingog na gayod ang tawo.

Misamot pagtingkag ang mga dalunggan ni Carlo sa iyang nadungog. Dili mahimong masayop siya. Ang lalaki nga nanawag kaniya mao ang wala hiilhing kaaway nga iyang gikaengkuwentro sa Luneta. Nakatimaan pa siya sa tingog niini dihang nagkasulti sila sa cellphone didto sa buhatan sa VIDA sa wala pa mahitabo ang ilang panag-engkuwentro.

“Nganong nanawag ka?” nangutana si Carlo.

Mikatawa ang didto sa pikas linya. Ug matud niini, “Gisuwerte ka pa gyud, Mr. Guieb, kay wala ka man matigbak sa atong panag-andohay.”

“Ikaw ang angay magbantay,” bahad ni Carlo. “Kay sa sunod natong panag-engkuwentro, ipaneguro ko kanimo nga mamatay ka na.”

Mikatawa na usab ang gikasulti ni Carlo sa telepono, katawa nga nagdala og kantalita. “Ayaw pangandak, Mr. Guieb. Kun anhaon tikaw karon,naseguro kong dili ka pa makahimo sa pagpanalipod sa imong kaugalingon.”

Nag-init ang kabubut-on ni Carlo sa gisulti sa lalaki. Maong iya kining gihagit. Niya pa, “lakaw diri sa akong gipuy-an aron magtigi ta.”

Apan ang gitubag sa kaaway usa lang ka bahakhak nga makalagot kaayong pamation. Napaak ni Carlo ang iyang wait. Misanting pag-ayo ang iyang dalunggan.

“Hain ka karon nanawag?” ni Carlo nga nagpangumo sa tumang kalagot.

“Sultihi ko kay akoy moanha sa imong nahimutangan.” -- Sumpayan pa