Kandidato pagka-mayor giimbitar sa ungo

Unsa? Unsa to, Gorio, gustong makigkita kanang ginganlag Rustico nako?” medyo miiknat ang kilay ni Mayor Esteban nga nakalitan sa gisulti kaniya sa iyang batabata nga si Gorio. Dugay na kaayo kini si Gorio kaniya.

Tingali kun wala siya malimot niadto pang unang higayon nga midagan siya pagka-Konsehal daan na kini si Gorio kaniya. Loyal ug die-hard nga matang sa usa ka tawo kini si Gorio. Ug dihang gisultihan siya niini nga gustong makigkita kini si Rustico kaniya ingon sa nakalad-ok siya’g laway sa kahikurat.

“Mao na, mayor. Kuan man gud, nagkasugat mi didto sa may merkado ug matud pa niya naluoy siya nimo karong eleksiyona,” ni Gorio pa nga mora’g maguwang lang sa hagawhaw ang iyang tingog. “Higayon na ni, mayor. Sus, pagkadaghan ra ba ana nila diha sa sityo Sungaysungay. Nagtuo ko nga anha na kana sila nimo modapig...”

“Yamat, di ba nadungog man kanang sityoha nga maoy pinuy-anan sa mga ungo. Wala man gani mosuway og tungas dihang dapita kay nahadlok sa namuyo diha. Ug kana si Rustico di ba anak man kana sa gidungogdungog nga puwerteng mangtasa ug namalbal gani didto sa silingang baryo,” medyo mikusog ang tingog sa mayor.

Siya karon ang incumbent nga mayor dinhi sa lungsod sa Santa Barbara. Ug ang moparang kaniya karong eleksiyona dinhi sa ilang lungsod mao si Otik. Dato kini si Otik ug ang iyang pagka-dato sinunod niya sa iyang mga ginikanan nga negosyante.

Ug kay patay na man ang iyang amahan mao siya maoy nakasunod sa tanang bahandi sa iyang amahan kay lagi bugtong anak. Ug siya ang gituboy nga mobatok kang Mayor Esteban.

“Oo, mayor, anak kana si Rustico ni Ingko Polin nga gidungog nga hilabihang ungoa. Pero, dili na angay nga hunahunaon, mayor, ang importante diha nga makuha na nimo sila, kay daghan kaayo nag mga sakop ug mga saop si Rustico didto sa sityo Sungay-sungay. Kun si Otik maoy makakuha ana nila, pildi ka, mayor,” mikunot ang agtang ni Gorio nga mipahayag ngadto sa incumbent mayor.

“Okey, mao man kaha, sa piniliay ra ba, botos maoy importante aron imong mapildi ang imong kontra,” miuyon si Mayor Esteban. “Unya, kanus-a ta motungas ngadto sa sityo Sungay-sungay? Unsa man, Gorio, magdala tag mga hinanib?” nagpakisayod ang mayor.

“Dili na kinahanglan, mayor. Kita na lang duha. Total duna man koy kalibre .45 nga pistola. Dili na mangunay og taga dinhi sa ato si Rustico, uy,” ni Gorio pa nga mikipatkipat ang mga mata ug unya nagpanilap.

“Kanus-a lagi motungas anang bukira, Gorio?” miusab ang mayor pagpangutana.

“Karong gabii, mayor,” mubong tubag ni Gorio.

Tuod, pag-abot nila didto sa balay nila ni Rustico mora’g naaninaw ni Mayor Esteban nga mingaw kaayo. Mora’g walay mga tawo. Gisugat sila ni Rustico nga nagpahiyom. Mestisohon kini siya ug ubanon ang mga buhok.

“Maayo kay wala ko nimo pakyasa, mayor, sa akong pagdapit nimo dinhi sa akong panimalay. Birthday man gud ron nako. Sige, lingkod, lingkod, Mayor Esteban, Ikaw pud. Gorio, lingkod,” mapahiyomon kaayo si Rustico. “Ug kay ikaw ra man gyud ang mianhi dinhi sa akong teritoryo, Mayor Esteban, kaming tanan dinhi anha gyud botar nimo...”

“Salamat kun mao kana, Rustico,” tubag ni Mayor. Unya giagda sila ni Rustico ug usa ka makabuhong nga panihapon. Daghang potahe, mga lamian. Unya, may gidalit si Rustico nga ilimnon. Mora’g pulahon ang kolor.

“Bahalina kini, Mayor Esteban. Lamian kini nga klase sa bahalina,” ug gidunol ni Rustico ang duha ka baso ug usa ka galon nga puno sa bahalina. Miinom si Mayor Esteban. Miinom pud si Gorio.

Pagkataud-taod, mora’g may namatikdan sila si Mayor Esteban ug Gorio sa ilang lawas. Migaan ang ilang mga lawas.

“He, he, he, Mayor Esteban, Gorio, inig pauli ninyo balik sa lungsod, puwede na mong duha manglupad. Makalupad na mo, kay gipatakdan ko man kamo. Ayaw lang kaguol, Mayor, kay anha ming tanan botar nimo. Ikaw lang gihapon ang mayor dinhi sa atong lungsod.

Ug kahilakon ang nawong ni Mayor Esteban. (Kataposan)