Gibaligya ni Beloy ang iyang kalag

"Satanas, ibaligya ko na lang ang akong kalag diha kanimo basta makatilaw ako og ang akong pamilya sa usa ka kinabuhing haruhay ug hamugaway. Gipul-an nako’g inampo sa Diyos apan pordoy gihapon ug misamot na hinuon og kalisud ang akong kahimtang ug pagpuyo!"

Nakaingon siya niini kay bag-ohay pa lang nga naimbargo ang iyang yutang usa ka ektarya nga naprenda ngadto sa bangko sa ilang dapit.

Ikaduha, bag-ohay pa lang usab namatay ang kamanghoran niyang anak nga si Junior tungod sa dengue fever ug gisamotan pa gyud kini sa sakit sa iyang asawa nga nagkaanam og kahigos ang lawas gumikan sa hilabihang kakulang sa bitamina ug mga sustansiyadong mga pagkaon.

Ikatulo, malagmit usab dili na makapadayon sa pagtungha ang kamaguwangan niyang anak nga si Ana tungod sa kakulang sa salapi ug kwarta nga ginaantos nila karon.

"Bwahahahaaa! Beloy gidungog ko ang imong pagtawag kanako!"

Nahapugwat si Beloy sa pagkadungog sa bahakhak sa iyang palibot.

"Paminaw'g maayo Beloy. Dawaton ko ang imong kalag ubos sa usa ka kondisyon," padayon pa ni Satanas.

"Unsa man nang kondisyona?" sukot ni Beloy nga gibati og labihang kahinam.

"Gikan karon hangtud sa ikanapulong tuig magpuyo ikaw lakip ang imong pamilya sa usa ka kinabuhing sapian ug kaadunahan. Tanang pangayoon mo ihatag ko sa walay langan basta inigkatapus sa napulo ka tuig mamatay ka sa kalit nga paagi og dalhon ko ang imong kalag ngadto sa impyerno nga akong gingharian!"

Unya, takulahaw lang nga nasapian ug naadunahan si Beloy uban sa iyang pamilya. Senyor na ang itawag sa iyang mga silingan ug sa mga katawhan ngadto kaniya. Daghan nag depositibong salapi si Beloy sa bangko. Nakapanag-iya na siya og dagkung mga kayutaan. Wala pay labot sa uban pang matang sa negosyo nga ubos sa iyang pangalan.

Sinaw, luho ug nindot na kaayo siyag kotse. Kadali ug paspas ra kaayo nga miligid ang panahon. Usa ka gabii niana, naghimo og usa ka salo-salo kon birthday party si Beloy. Busog kaayo siya ug taliwala sa hudyaka ug kalipay, kalit lang nga misakit ang dughan ni Beloy. Gitabang siya sa iyang mga bisita niadtong higayona apan nakabsan gyod si Beloy sa iyang kinabuhi ug sigon sa kasabotan, gidala ni Satanas ang iyang kalag ngadto sa impyerno! (Katapusan)