Little black book

Gula 26

Dugay kaayong nitubag si Crisanta maong giusab ko ang pagpangutana kaniya mahitungod sa gi-propose nakong gugma.

“Ang imong pagpakahilom nagpasabot ba nga gidawat mo na ang akong gugma, Cris?” Gisukit ko siya.

“Naunsa ka diha, Jose?” Misikmat si Crisanta.

“Ingon pa bitaw nila, silence means yes. Gawas pa, ikaw ra baya’y nag-ingon kaniadto nga kun di pa ta klasmet sa first year pa ta, hayan imo kong sugton.”

“Wa ka pa diay malimot sa akong gisulti?”

“Kaayo. Gimahal ta gud ka.”

Mikagiki og katawa si Crisanta.

“Sige na, Cris,” giingnan ko siya. “Gusto kong masayod sa imong tubag kun may paglaom na ba ko.”

“Hatagi una ko’g higayon sa paghunahuna, Jose,” niya pa.

Maong mipailob ko.

Pagkasunod semana, nakahigayon ko sa pagpakigsulti pag-usab kang Crisanta. Gisukna ko na usab siya mahitungod sa gugmang gihalad ko kaniya. Gipakita ko ang kaseryoso sa among panag-atubang.

“Tingalig masuko si Myrna,” niya pa.

“Nagbuwag na man mi si Myrna,” giingnan ko siya. “Dugay na.”

Gisugot ko ni Crisanta! Labihan nakong lipaya. Sa kataposan, naangkon ko na gayod ang iyang gugma.

Milabay ang usa ka bulan. Pista sa barangay nilang Crisanta. Samtang may gipahigayon nga koronasyon sa rayna-rayna didto sa sentro sa barangay, gidala nako si Crisanta ngadto sa usa ka payag nga nahimutang sa usa ka hilit nga dapit. -- Sumpayan pa