Ug nilurang ang unos

Naglamugdong ang dagway sa langit. Mao sab kini ang gibati ron ni Milena. Nagkuob siya sa iyang katre. Dinhi unta si Romir kaganinang buntag apan wa niya matagad. Si Nang Besing niya mao ray niatubang niini sa silong. Wa sab pasak-a kay nabalibaran na ni Nang Besing nga wa siya diha sumala sa iyang gitugon niini kay nasuginlan siya ni Lucia sa miaging adlaw nga moanha gyod kini niya.

Igo lang naminaw si Melina sa gisulti niini.

"Wa ko magtuo nga nakalakaw ka kay Sabado man ron. Wa kay klase. Naa ka ra’s taas. Monang makigsulti lang ko nimo kay wa ka na mobawos sa akong mga suwat nimo."

"Say bawsan nga wa ka may suwat? Ikaw hinuoy wa mobawos! Kada semana kong may suwat. Hibawo’s Bestre ini." Apan didto ra ikasinggit sa iyang alimpatakan.

"Di ko gyod ikaw hikalimtan. Ga. Gani sa usa ko ka mga suwat nangayo ko’g numero mo’s selpon. Gusto ko untang makig-istorya nimo kanunay. Apan wa kay gihatag." Kahilakon kining nakigsulti kaniya.

Unya wa dangtig dugay, sa dihang nisugod pagkanuos ang hangin ug nanaligsik niingon kini: "Adto na lang ko Ga. Bawnon kong mga luha sa kamingaw kanimo," ug nihilak gyod kini.

"Ugma a..a...akong "flight" kay mogikan na ko’s States dad-on ko unta ikaw didto."

Taudtaod samtang nagngiyaw pang unos, dihay nagpasinguwang niabot nga nagsakay’g motor. Sa pag-abli ni Nang Besing, bisag nagtulo pa’s kabasa ang diyaket niini nideretso kinig saka. Si Bestre, ang kartero. Diha siya niadtong tungora sa lingkoranan simpig sa bintana.

"Pasaylo-a ko, Ma'am." Nitupad kinig lingkod "Ay lang sab pahibaw-a si Romir nga diri ko. Naanhi ko kay di madawat sa akong konsensiyang nakalimbong ninyo. Tua durong hilak ni Romir. Ug nasuginlan kong diri siya apan wa nimo tagda."

Naikat iyang mga kilay sa kahikurat kun unsay nalimbong niini kanilang Romir.

Gihabwa niini gikan sa basa niyang bag ang duha ka plastik nga puno’s mga suwat. Pulos sinilyohan.

"Nganong nia man nimong mga suwat ni Romir para nako?" Nadako ang iyang tingog. Gihiling pod niyang laing plastik ug sa dakong kahikurat tuang mga suwat niya para ni Romir.

Nanglurat ang iyang mga mata sa kasuko nga nitutok ni Bestre.

"Pasayloa tawon ko Ma'am. Wa ko na ikapadala tungod sa sugo ni Tiyo Nemesio, amahan ni Romir, nga akong uyoan. Gituman kong iyang sugo gililong pa’s ig-agaw. Sala ko gyod na", ug nihilak si Bestre.

"This is sheer negligence. And the penalty is dismissal." Naglagot siya ni Bestre.

"Pasayloa tawon ko, Ma'am. Pasayloa sab si Romir. Wa siya’y sala niini. Buot buwagon kamo ni Tiyo Nemesio kay may ipaasawa untang lain. Apan wa mosugot si Romir. Karon kay patay na’s aksidente sa sakyanan sa niaging buwan si Tiyo, wa na untay makababag. Si Tiya nakaboto man nimo. Ikay tuyo ni Romir kay mangasawa unta nimo."

Wa na motingog si Melina. Si Nang Besing nga nagpaminaw lang kanila sa pikas daplin nalipay sa nakitang kalit nga kahayag nga nihun-ag sa dagway ni Melina, sama sa paglurang sa unos sa gawas. Nisulod kini sa kuwarto biniyaan si Bestre sa gawas.

Nanamilit na lang si Bestre ug nikanaog. (Kataposan)