Anino sa kulto

Gula 5

“K-kinsa ka?” ni Guieb, “u-ug unsay imong tuyo kanako?”

Mikatawa ang lalaki nga iyang gikahinabi sa cellphone. Mibahakhak kini’g duro, Nagsapwang og kantalita ang kagiki niini.

“Kinsa ka?” Mitungas ang tingog ni Guieb nga nagsugod nag kapikal sa kinataw-an sa lalaki. “Pagpaila sa imong kaugalingon.”

Relaks lang, Mr. Guieb,” nagkanayon ang lalaki. “Tingali baya kun atakehon ka sa high blood ug mosayo na hinuon paghunong ang imong edad.”

“Unsay imong tuyo nako? Pagsulti...!”

“Buot ko lang ikaw nga pahibaw-on, Mr. Guieb nga sukad karon dili ko na ikaw hatagan og kalinaw. Hasolon ko ikaw kanunay. Sama ako sa imong anino nga magsige’g sunod-sunod kanimo.”

“Wala ako makaila kanimo...!”

“Makaila ka ra unya kanako inig-abot sa tukmang panahon. Paabota lang kanang higayona, Mr. Guieb. Paabota lang...”

May isulti pa unta si Guieb dihang iyang namatikdan nga may pulang siga nga midapat sa dapit sa dughan sa gisul-ob niyang diyaket. Nakasabot siya sa sitwasyon, dihadiha gipaliraw niya ang iyang mga mata ngadto sa gawas aron pagsuta kun diin gikan ang maong siga. Mao dayoy misugat sa iyang panan-aw ang usa ka lalaki nga nagsakay sa awto nga abohon. Nagpaatbang kini sa ilang buhatan. Ang walang kamot niini naggunit sa taas og kalibreng hinagiban nga gitumong kaniya samtang ang tuong kamot naggunit sa cellphone. Nagtuo si Carlo nga mao kini ang tawo nga iyang gikasulti sa cellphone.

“Niay sample, Mr. Guieb,” nagkanayon ang lalaki diha sa cellphone.

Nakasabot siya sa gisulti sa lalaki, si Carlo wala mag-usik og higayon. Dihadiha midagan siya palayo sa bentana. Kun naulahi pa siya’g usa ka lakang, hayan napul-og siya dungan sa pag-ulbo sa bentana nga naigo sa bala sa gamhanan kaayong hinagiban. -- Sumpayan pa