Anino sa kulto

Karon misantop sa hunahuna ni Guieb nga posibleng may laing misyon na usab nga isangon si Z kaniya. Naghunahuna niini, naghinamhinam siya nga mahidangat gilayon sa buhatan sa VIDA. Ugaling lang kay naghuot ang kadalanan sa daghang mga sakyanan. Trapik kaayo! Mao nga mipailob na lang siya.

Paghunong sa taksi nga iyang gisakyan tungod sa VIDA Building, gibayran gilayon niya ang sapyor sa plitehan. Nanaog siya dala ang knapsack nga gisudlan sa iyang mga gamit. Dihang nakabiya na ang taxi sa iyang tungod, mibarog siya’g makadiyot sa daplin sa dalan ug gianinaw ang nagbuntaog nga bilding sa ilang ahensiya nga gipasundayag sa iyang atubangan. Kompleto sa hi-tech nga mga kahimanan sa paniktik sa ilang buhatan. Maoy gikuhaan og modelo niini ang buhatan sa CIA. Lawom ang ilang intelligence network.

Mitanyag ang VIDA sa nagkalainlaing serbisyo sama sa surveillance operation, undercover investigation, evidence gathering with photo/video coverage, background investigation, property investigation, theft investigation, record verification, locating missing person, corporate profile, insurance claims, security audit ug handwriting/document examination. Gihimo na ni Carlo Guieb ang undercover investigation sa iyang misyon sa Sugbo diin migamit siya’g laing identity.

Pagkilab sa pipila ka daklit, mihinay siya paglakaw. Midiretso siya pagsulod. Misugat kaniya ang kahumot sa air freshener ug ang kabugnaw sa aircon. Milahos siya sa lawak-buhatan ni Z sa ikaduhang andana sa edipisyo. Kutob sa mga tawo nga iyang nasugatan mitimbaya kaniya. Mga detektib usab sila sama kaniya-- mga hinashasan nga mga tiktik. Paghitungod niya sa lawak-buhatan ni Z, kalit lang mibukas ang pultahan nga awtomatik. Milahos siya pagsulod. Maoy misugat sa iyang panan-aw si Z nga nagkatawa nga miatubang kaniya. Nakita na diay siya niini sa monitoring screen nga diha sa atubangan niini sa iyang pagsingabot. -- Sumpayan pa