Higugmaa ang imong kaaway

Sa usa ka kalye sa siyudad, nag-abot ang magkaribal nga pundok sa duha ka fraternities nga gipangulohan nilang Gally ug Pons. Nahitabo ang panag-engkuwentro sa duha ka pundok ning gabhiona. Naglamoklamok.

"Ang daotang binuhatan sa inyong pundok maoy naghatag og daotang imahe sa among grupo, Pons! Kami ang gipasanginlan sa tanan....!" nagpangagot ang bag-ang ni Gally nga miharong kang Pons, samtang ang ilang mga sakop nagpadayon na sa ilang sinukmagay ug binunalay sa dalan.

"Ay na lang ta ninyo, Gal! Ang daotan ninyong binuhatan maoy naghatag og mansa sa among grupo! Busa, tapuson na nato ning tanan karong gabhiona! Patay kun patay....!" nagpaminti usab si Pons ug misamot kahiyong ang hikuton niyang mga mata nga misukmag dayon ngadto kang Gally. Mibalos sab dayon si Gally sa pagpatid kang Pons. Padayon nga nagkarambola ang duha ka magkaribal nga fraternities. May misinggit nga nagpakabanang tawo diha sa kalye.

"Pagtawag mo’g mga polis aron masanta ning panag-engkuwentro sa duha ka pundok...!"

Unya, usa ka sakop ni Gally nga hilom nga milipot sa luyo ni Pons ug gihansakan kini sa mahait nga batangas knife. Miping-it sa kasakit si Pons nga nagpugong sa iyang kilid ug nalup-og. Unya, maoy nabati ang siren sa nagdangandanga nga patrol car sa kapolisan. Nagkatibulaag sa pagpanagan ang mga sakop nilang Gally ug Pons. Sa atbang nga koral nga semento, abtik nga nagpahipi si Gally ug naniid sa mga polis nga abtik mibaswat sa dugoong lawas ni Pons nga nag-agulo ug gisakay sa patrol car.

"Dali, dad-on ta kining samaron sa Cebu City Medical Center...!" nadungog ni Gally ang mando sa usa ka polis.

Pagkaugma, hilom nga nagpakisusi si Gally sa kahimtang ni Pons sa ospital.

"A, kadtong nadunggaban kagabii sa magkaribal nga frats? Lisod ang kahimtang sa pasyente sa Ward 10! Tungod sa kalawom sa samad sa iyang dinunggaban, daghang dugo ang miagas sa iyang lawas! Nagkinahanglan siya og dugang dugo nga iabuno niya karon. Ang nakaparat kay nahutdan sa istak sa dugong tipong O plus! Kun dili kaabunohan og dugo ang biktima, dili na siya kaugmaan....!" tug-an sa nars nga gisusi ni Gally.

Nagpitaw ang mga mata ni Gally nga nasayod sa talandugong kahimtang sa hingpit niyang kaaway. Parehas ang tipo sa dugo nila ni Pons! Gaan ang mga lakang ni Gally nga miduol sa usa ka nars nga bag-o lang gyud nga migula sa Ward nga nahimutangan ni Pons.

"Nars, gusto kong magpakuha og dugo! Akong idonar sa pasyente sa sulod!

"Praise the Lord! Salamat nga masalbar pa gayud ang maong pasyente!" nakatuaw ang nars nga mapahiyumong mitutok kang Gally.

Daw miluag ang dughan ni Gally nga naghunahuna sa iyang pagabuhaton karon sa higpit niyang kaaway sa magkaribal nilang fraternities. Mipatigbabaw pa gihapon ang dako niyang gugma sa iyang kaaway! (Kataposan)