Little black book

Gula 21

Na-turn off gyud ko sa bad breath ni Myrna. Nakadesisyon kong bugtoon ang among relasyon. Total, wala man gyud ko mahigugma niya. Gipangulitawhan ko lang siya gumikan sa sulsol sa akong mga klasmet nga nagtuo nga na-in love si Myrna kanako.

Si Myrna ingon sa nakamatikod nga naglikay na ako kaniya. Nahibulong tingali siya sa gipakita kong lihok, usa niana ka adlaw nangita siya og paagi nga magkasulti ming duha. Tuod man, nakigsulti ko niya. Mas maayong magkadinayganay na mi aron dili na mi maglaom sa usa’g-usa.

“Nakamatikod kong mora’g nausab ka na, Jose,” nagkanayon si Myrna. “Mora’g molikay ka na kanako.”

“I-I’m sorry, Myr,” giingnan ko siya.

“Unsay buot mong ipasabot sa pagpangayo mo’g sorry kanako?”

“Nakadesisyon kong putlon na nato ang atong relasyon.”

“Tungod ba kang Crisanta?”

“Ayaw iapil si Crisanta sa atong sitwasyon.”

“Nasayod kong nanguyab ka sab ni Crisanta.”

“Way third party nga na-involve sa akong desisyon pagputol sa atong relasyon. Miabot na lang gyud sa punto nga akong nasuta nga di ko magmalipayon sa pagpakigrelasyon nimo. Busa, I’m sorry, Myrna...”

Mao na kadto ang kataposang panagsulti namo ni Myrna. Nabugto gyud ang among relasyon. Namatikdan kong nausab pud ang iyang tinagdan nako.

Miabot ang pagpahigayon sa intramurals sa among eskuylahan diin gihimo ang lainlaing sports activities. Mora’g nagpista sa mga paa ang among eskuylahan tungod kay nanag-short pants man lang ang mga estudyanteng babaye nga miapil sa lainlaing sports discipline. Nadayag pag-ayo ang puti ug is-is nilang mga paa sa ilang gipangsul-ob.

Akoy nakabenepisyo’g maayo sa maong hitabo. -- Sumpayan pa