Gula 1
Maoy paghagtok sa ikapito sa kabuntagon sa pag-abot sa V-hire nga gisakyan ni Carlo Guieb sa terminal sa dakbayan sa Tagbilaran. Nanaog dayon siya ug nigawas sa terminal. Nakadapit sa iyang pagtagad ang newstand nga gibantayan sa usa ka hamtong nga babaye.
Miduol siya sa newstand. Nipalit siya’g usa ka kopya sa Banat News. Human kabayri ang pamantalaan, gipara niya ang nagdanga-danga nga taxi. Misakay dayon siya paghunong niini sa iyang tungod. Giingnan niya ang driver nga sa airport siya magpahatod.
Samtang nagdagan ang taxi, gipaklipakli ni Carlo ang Banat News. Nakabig ang iyang pagtagad sa balita bahin sa usa ka kulto nga naglihok sa Cebu, ang Dios Amahan nga gipangulohan sa usa ka Daddy Divine. Gibasa ni Carlo ang balita. Nakontrobersiyal ang maong kulto tungod sa pasangil nga si Daddy Divine nangmolistiya sa batan-ong mga babaye nga sakop sa iyang pundok.
Igo lang siyang nahuman og basa sa maong balita, nihunong ang taxi nga iyang gisakyan sa gawas sa airport. Human makaplite ngadto sa driver nanaog dayon siya. Misulod dayon siya sa airport aron maka-onboard na sa ayroplano nga iyang sakyan paingon sa Manila. Ang ayroplano nilarga segun sa gitakdang oras nga eskedyul niini. Paglabay sa usa ka oras nga panaw, mitugpa ang abyon sa NAIA sa kaulohan. Paggawas niya sa arrival area nangita dayon siya’g kasakyan.
Samtang nagsakay sa taksi nga iyang gipakyaw paghatod kaniya sa Vanguard Intelligence and Detective Agency, milagingling sa panumdoman ni Carlo Guieb ang mga pulong ni Z sa ilang panagsulti sa long distance.
“Balik diri sa kaulohan sa labing daling panahon,” ni Z pa. “Gikinahanglan ko ang imong serbisyo.” -- Sumpayan pa