Little black book

Gula 20

Kun sa sinultihan pang minaro, na-“one click” ra nako si Myrna. Tinuod gyud diay nga nakagusto ug na-in love siya nako.

Nag-date dayon mi si Myrna nianang pagka-Domingo. Nagkuyog mi’g panimba sa dakong simbahan sa kinapusoran sa lungsod sa Santander.

Human sa panimba, nagsuroy mi. Naglagoy-lagoy lang gud mi sa merkado ug sa ubang mga dapit sa kinapusoran sa lungsod nga gidansohan sa daghang mga tawo. Lingaw-lingaw lang ang among tuyo.

Dihang inanay nang mikamang ang kangitngit sa nawong sa kalibotan, nangadto mi sa plasa. Dili kaayo daghan ang mga tawo sa plasa. Nangita mi’g kalingkoran. Sa nakapahimutang na mi, gisugdan namo ang panagkabildo. Bisan unsa lang ang among gihisgotan.

Unya, dihang nadugay, may misantop sa akong hunahuna. Milingi-lingi ko. Labong ang mga tanom nga nagsalipod sa palibot sa among nahimutangan. Wala ko maglangan. Nananghid ko ni Myrna nga mohalok ko sa iyang lips. Misugot dayon ang kanahan! Gikulbaan ko...sa kahinam!

Miarangkada dayon ko. Giukoban ko’g maayo ang iyang lips. Pero kadali ra kong milunga. Gibati ko ang kaluod. Pastilan, labihang bahoa og baba ni Myrna! Wala man tingali totbras-totbras!

Human sa kadiyot ra kaayo namong hinagkanay, nakigpamauli na ako ni Myrna. Wala koy tingog-tingog samtang gihatod ko siya paingon sa ilang pinuy-anan. Mora ko’g nawala sa akong kaugalingon.

“Salamat sa imong paghatod, ha,” ni Myrna pa sa among pag-abot sa ilang balay. “Magkita na lang ta ugma sa school.”

“Sige,” mubo kong tubag.

Apan nianang pagkaugma, wala na ako magpaduol kang Myrna. Nakahukom kong molikay na kaniya. Wala na akoy interes sa pagpadayon sa among relasyon. Mora’g nawad-an ko’g gana sa among panag-uyab. -- Sumpayan pa