Ace Jayssan

Samtang nanihapon ming tibuok pamilya, nangutana akong kinamagulangang anak: "Tay, diin man nimo kuhaa ning akong ngalan? Nganong kini mang ngalana ang imong gipili?"

"Anak, ikaw ang unang bunga sa gugma. Ang dugo nga naglatay sa imong kaugatan, kombinasyon sa duruha ka kasingkasing nga nagminahalay. Larawan sa duha ka dagway nga nahimong usa." Pasiunang tug-an ko sa STC Mass Com graduate kong panganay.

"Tatay, ba. Ayaw kog balaki. Please tell me straight!" Hangyo niya.

"Ok, ok. I will.": Ug mipadayon ko. "Kanang imong ngalan wala na sa almanake. Puwerteng kompyut nako sa mga letra nga may iyang sakbang nga numero, diin kun i-add tanan, ang Total: 9. Sa mga Insek god, bisag sa paghatag og ngalan ngadto sa ilang anak, duna silay punsoy. Nindot kuno kun ang kombinasyon sa mga letra moresulta sa numero gikan sa 6 ngadto sa 9. Hinungdan, nga naaghat kog sunod nila. Good luck kuno ang 6, 7, 8. And 9 is the best."

"Mao ba, Tay?" Ni Ace Jayssan pa nga misamot ka interesado sa pagpaminaw nako.

"Kanang Ace, didto na nako kuhaa sa baraha. Mao nay kinatas-ang numero. Magtug-an kana, hain ko magtrabaho. Sa dapit, diin gikan ang bread and butter nga maoy gibuhi ko ninyo. Unya kanang 'Jayssan', kombinasiyon na sa mga ngalan namong Nanay Susan nimo. Tanang letra ana, kabahin na sa amoa. Gipili. Gihiusa! Kanang 'Jay' sa ako nang 'Javier Yntig'. Kanang 'Ssan' sa kang Nanay na nimong 'Susan'. Mao nay kinatibuk-ang istorya giunsa paghulma ang imong ngalan, anak."

"Beliba gyod nako nimo, Tay, uy. Hasta pag-umol ninyo sa akong ngalan, gibuhatan man nimog story. Writer gyod ka, da. You know, I love my name as I love you. Apir, bi!" Ni Ace Jayssan pa nga mibarog ug nakighampakay sa akong palad. Unya, malipayon kaayo siyang mi-kiss nako. Natagak akong luha human mabati ang pagmahal sa usa ka anak. (Katapusan)

Show comments