Ang bayot nga babaye

Gula 5

Sa hilom gipangulitawhan ni Jeffrey ang administrative assistant nga si Leny. Apan mabinantayon kaayo siya sa iyang mga lihok kay nasayud siyang ikasuko gayud kini ni Jenny kun mahibaw-an.

Wala mapakyas si Jeffrey sa iyang tinguha ni Leny kay gidawat niini ang iyang gugma. Apil si Leny mabinantayon sa iyang lihok kay wala man malilong kaniya nga si Jeffrey may relasyon ug ang ilang vice president nga mahuyang.

Usa ka gabii, nakigdeyt si Jenny sa ambongan nga maniniyot. Hangtud nga ang ilang pagpanuroy didto mosangko sa usa ka kwarto sa hotel. Gitagbaw nila ang ilang kaugalingon.

Bisan og nasayud si Jeffrey nga artipisyal ra nga langob ang iyang gisudlan, apan natagbaw siya kay ang lawas ni Jenny sama gayud sa tinuod nga babaye apil na ang maanyag niya nga dagway.

Apan nakalitan siya sa gisulti ni Jenny human sa ilang paglipay-lipay. “Jeff, natingub na kanimo ang akong pagbati ug magpasidaan lang ko nimo nga ayaw gayud ako og budhii.”

Nanglabay ang mga adlaw. Nasayran ni Jeffrey nga nagkaaway sila si Jenny ug ang iyang amahan nga maoy chairman sa ilang kompaniya. Nasayran ni Don Rafael nga nakigrelasyon si Jenny sa iyang executive assistant.

Gitangtangan si Jenny sa posisyon sa ilang kompaniya. Apil nga gitaktak sa trabaho si Jeffrey. Apan wala kaayo maapektahi si Jeffrey kay daku na siya og natigum sa dagku niyang sweldo, mga incentives ug datung ni Jenny.

Usa ka Sabado, nagkasabut si Leny ug Jeffrey nga mag-over night sila sa usa ka beach resort sa usa ka isla sa Olango Island. Nabantayan ni Jeffrey nga walay hunong ang pagkontak kaniya ni Jenny apan wala niya tagda.

Nagpusot-pusot ang mga text messages nga gikan ni Jenny nga nasabut niya nga nasuko na kaayo ang mahuyang tungod sa iyang pagbaliwala sa mga tawag ug pagtubag sa text message.

Didto na sila sa gamay’ng isla tumoy nga bahin sa Olango Island dihang nadawat na usab ni Jeffrey ang text message gikan ni Jenny nga nakapabalaka kaayo kaniya.

“Giingnan ko ikaw Jeffrey nga ayaw ko’g budhii. Ikaw ang nakaingon sa ako karong kahimtang. Kay imong gituyoan, dili ka magmahay! Matultolan man gani sa usa ka hulmigas ang asukar, ikaw pa kaha.”

Nasabut ni Jeffrey nga hulga kadto ni Jenny. Nasayud siya nga tinud-on g’yud ni Jenny ang iyang hulga kun sila masakpan. Apan gikumbinsir niya ang iyang huna-huna nga dili na sila matultolan pa ni Jenny. (Taposon sunod gula)