Bunga Lalawigan Sa Sugbo

Ning hapona, nagkalingaw sa pagpanambo si Tonyo sa bentana sa ilang balay ni Nora. Sa atbang, maoy nasugat sa iyang panan-aw ang dakong punoan sa mangga nga namungingi na sa daghang bunga. Nagbunga na gayud ang ilang kakugi ni Nora sa paggalam ug pag-amuma sa maong punoan sa mangga. Pagkadaghan og bunga sa mangga! May mga bunga nga nahinog na.

"Nyo, ugmang adlawa pupuon na ang mga bunga sa atong mangga! Gikontak na nako si Onyok, ang mamalitay og prutas sa atong baryo...!"

"Maayo nuon, Nor! Mapuslan na gayud nato ang atong kakugi ug kahago sa pag-alima sa maong punoan sa mangga! Tam-is ra ba diay kaayo ang hinog nga bunga sa atong mangga...!"

"Bitaw, Nyo! Ug tungod sa maong punoan sa mangga nga namungingi na sa daghang bunga, daghan sa atong mga silingan nga gibati’g kasuya ug kasina nato...!"

"Pasagdan lang nato sila, Nor! Ang importante nga magpabilin ang maayo tang taras ug kinaiya ngadto kanila....!"

"Usahay, di ko kapugngan nga mapikal ning atong mga silingan, Nyo! Luyo sa atong kaayo ug pagkamahigalaon nila, kita pay libakon ug intrigahon nga ngil-ad og batasan...!"

"Dili na lang nato sila tagdon, Nor! Ang mahinungdanon nga mopatigbabaw ang bunga sa atong pagka-maayong silingan...!"

Miungot na usab ang panan-aw ni Tonyo sa dakong punoan sa mangga nga namungingi og mga bunga sa atbang. Nasiklapan niya ang pipila ka mga silingan niya nga nahiagi haduol sa punoan sa mangga ning hapona nga nagkalingilingi ug mipunit og bato. Kusganong mihuyad ug gibato ang namungingi nga bunga sa mangga. Dili kalikayan nga aduna gyuy maibog pagbato sa mga hinog nga bunga sa mangga!

Nagyangoyango si Tonyo. Nakasabot siya sa ilang kahimtang ni Nora sa ilang baryo. Gikinahanglan ang tumang pailob nilang magtiayon. Nahisama sila sa dakong punoan sa mangga nga namungingi sa daghang bunga sa atbang, nga dili kalikayan, aduna gyuy mobato sa bunga sa maayo nilang binuhatan. (Kataposan)