Walay kamatayon ang gugma

GULA 104

“Nagbasol na ko, Jody. Lahi na ang Randy nga imong gikaatubang karon kay sa kaniadto. Hatagi ko’g laing higayon aron ikapamatuod ko ang tinud-anay kong pagmahal kanimo.”

“Lahi na usab ang Jody nga imong gikaatubang karon. Dili na ako ang kaniadtong Jody nga sayon ra nimong bulatikan.”

Huyhoy ang mga abaga ni Randy nga mibiya sa iyang gipuy-an niadtong gabhiona.

Misulod si Jody sa iyang lawak dihang nakalakaw na si Randy. Maoy unang nakadapit sa iyang pagtagad si Lovi nga nahinanok pag-ayo. Nahimuot siyang nagtan-aw sa iyang anak.

Mihinay siya pagduol sa gihigdaan sa bata. Iya kining gihagkan sa aping. Milihok og diyotay ang bata nga nakabatyag sa iyang paghalok. Nahimuot siya sa reaksiyon sa bata.

Kang Lovi na lang natingob ang pagtuyok sa iyang kalibotan. Alang kaniya, wala nay nakulang kaniya. Aduna na siya’y dakong katigayonan. May anak na siya nga natingban sa iyang pagmahal. Wala na siya magkinahanglan og laing binuhat nga iyang mahalon ug magmahal usab kaniya. -- Sumpayan pa