Walay kamatayon ang gugma

Gula 103

Tungod kay purdoy na lagi kaayo, lakip ang realty business ni Randy gibaligya niini ngadto kang Jody.

Si Megan, kaha tungod sa kauwaw nga gibati ug dili makadawat sa kamatuoran nga napurdoy na sila, nabalitaan na lang ni Jody nga naghikog kini.

Bisan nahiubos apan gikasakit gihapon ni Jody ang kamatayon ni Megan. Wala siya malimot nga igsuon niya kini. Kun iya man nga gilisudlisod sila si Randy ug Megan kana tungod kay gusto lang niyang ipabatyag ngadto kanila ang kapait sa iyang kinabuhi kaniadto diin sila ang nakaingon. Apan sa kahiladman sa iyang dughan, gimahal gihapon niya si Megan isip igsuon.

Dihang gilubong na ang patay’ng lawas ni Megan, mikuyog siya paghatod niini ngadto sa kataposang pahulayan.

Usa ka buotan ug masinaboton nga employer si Jody. Wala siya maghimo’g revamp sa mga empleyado sa mga kompaniya ni Randy nga iya nang napanag-iya. Dili siya buot nga makulban sa kaldero ang mga empleyado. Si Randy ra iyang gitaktak. Siya nay mibarog nga presidente ug general manager sa kompaniya. -- Sumpayan pa