Walay kamatayon ang gugma

Gula 102

Human sa ilang panagsulti, huyhoy ang mga abaga nila ni Randy ug Megan nga nanggawas sa iyang buhatan.

Apan si Jody ingon sa nahimuot sa iyang gihimo. Nalipay siya sa gipakitang reaksiyon nila ni Randy ug Megan pagkakita nila kaniya kaganina. Alang kaniya, miepekto gayod ang gihan-ay niyang mga plano.

Taas gayod og garbo sila si Megan ug Randy Maglana. Bisan naapiki na sila sa sitwasyon, nangita pa gayod og paagi nga dili maimbargo ni Jody ang ilang propiyedad bugti sa dakong utang nga dili nila mabayran.

Gipanghagad nila ni Megan ug Randy ang ilang mga propiyedad ngadto sa laing mga magpapatigayon. Buot nilang ibaligya ang ilang mga negosyo ngadto sa lain ug ang halin niini mao nay ilang ibayad ngadto kang Jody.

Nasayran kini ni Jody tungod kay nagsuhol man siya’g tawo nga maoy mangespiya sa duha. Wala na gayod niya hatagi’g higayon sila si Megan ug Randy nga makagios pa. Wala na niya lugaki ang iyang bakos sa paggukod kanila.

Gamhanan na ang tingog ni Jody sa business community. Tungod sa iyang awhag, walay magpapatigayon nga nangahas pagpalit sa mga negosyo nila ni Randy. Mao nga nasakmit gayod ni Jody ang maong mga propiyedad. -- Sumpayan pa