Milugak bisan gihugtan

Dili ka ba mauwaw gikan sa tsismis sa atong mga silingan, nga mangasawa ka kanako, nga makaupat na mabiyuda Oming?" ni Porlisinda pa nga hugot nga namalibad nga magpakasal.

"Bisan makapila ka pa mabiyuda Porlisinda, andam ako nga modala kanimo sa altar sa kaminyoon!" hupong sa kamatinud-anon nga mitubag ngadto sa babayeng iyang gipakamutya sa tiunay niyang gugma.

"Pakamatyan ko kining gugmaha kanimo Porlisinda, kun kinahanglanon man gani?"

Hinuon bisan makaupat na mabiyuda si Porlisinda, wa gayod mausab ang kabigot sa iyang lawas, tingali sa upat niyang naanhing nga bana, wa gayod sila tugahi bisan usa na lang ka buok anak, nga matawag og handumanan sa iyang kaminyoon.

"Basin baya Porlisinda ... nga adunay mamatngonan kanimo si Oming, ug moatras na hinuon sa pagpakasal kanimo?" dihay gipahimangno ni Nanay niya Repsalyang, nga taudtaod na usab nga nabiyuda kang anhing Tatay niya Bartolito.

"Ayohon ko lang Nay Repsalyang, pagdala si Oming, total masayod naman siya sa kahimtang sa akong pagka-babaye nga makaupat na mabiyuda?" ni Porlisinda pa nga mapahiyomon.

Bisperas sa kasal nila ni Oming ug Porlisinda. Wa gayod batia og kaduka ang inahan ni Porlisinda. Panid-an niya kun unsay buhaton ni Oming sa iyang anak.

Didto ra ang duruha sa may sulod sa kuwarto. Daghan man god nga pinalit si Oming, nga mga regalo niya sa kasal ni Porlisinda, sama sa boda, sapatos ug ilabi na gayod sa wedding ring.

"Pagkalugak god diay niini nga akong gipasulod, bisan kun hugtan pa nako og duot? Lugak gayod kaayo!" ni Oming pa nga nakapatugaw sa pagkatulog sa inahan ni Porlisinda.

"Ang maayo unta Oming ... kun nagpasukod una kitang daan? Total ugma pa bitaw ang atong kasal?" nagkanguhal ang tingog ni Porlisinda.

Nagduda na gayod si Nanay niya Repsalyang, nga nagsinukdanay na si Oming ug si Porlisinda. Gipangulbaan na hinuon siya, basin sa kawangwang na sa kadako sa armas sa iyang anak, nga makaupat na mabiyuda ... dili na mopadayon pagpakasal si Oming?

Maoy iyang naabtan sa pagsulod niya sa kuwarto ... nga nagsukod diay si Oming, sa wedding ring sa tudlo ni Porlisinda, nga hilabihan na nga lugaka.

Diha pa siya magkatawa. (Kataposan)