Little black book

Gula 10

Gikuyawan na hinuon ko nga tingalig akoy mapahungawan ni Bernadith sa iyang kasuko ngadto kang Paquito.

“A-ayaw lang laina pagsabot ang akong gisulti, Dith,” giingnan ko siya. “Di ko gustong masuko ka kanako.”

“Okey lang,” ni Bernadith pa. “Wa man koy angay ikasuko sa imong pangutana, Jose.”

Nakapasalamat ko sa hilom.

“Wa man ko masuko nga nasayran ni Paquito nga giregla na ko,” gipasabot ko ni Bernadith. “Ang akong gikalagotan kay iya pa man gayod kining gipanabi ngadto sa uban natong mga klasmet.”

“M-mao ba?” Mao ray akong nalitok.

“Para nako, di man tingali kinahanglang ibandilyo pa niya’s tibuok kalibotan nga nadalaga na ako.”

Nakasabot ko’s punto ni Bernadith maong gipadayag ko ngadtokaniya ang akong pagsimpatiya.

Sa hilom nakaingon ko nga kasayo bang nadalaga ni Bernadith. Grade six pa gud mi. Duna diay ingon ini?

Unya, kalit nalain ang akong hunahuna. Dihadiha gisukna ko si Bernadith sa tingog nga halos magpakiluoy na ngadto kaniya.

“May paglaom na ba ako, Dith?” Giingnan ko siya. “Ikaw ra baya gyu’y akong gihigugma hangtod karon.”

“Unsa man nang gugmaha,” ni Bernadith pa. “Puppy love?”

“Tinud-anay ning ako, Dith,” uban sa kaligdong sa pamunto sa sinultihan ang akong paglitok sa maong mga pulong.

Gitutokan ko ni Bernadith. Wala lang tuyoa, nagkabag-iray ang among mga panan-aw. Dugay, gikulbaan ko sa kahinam. Nagtuo kong sugton na gyud ko ni Bernadith. -- Sumpayan pa