Pagbunok sa uwan

Gula 7

Nakabantay si Dorin nga daw nahingangha si Renante pag-ingon niya nga nakapanirador kini’g mga langgam kilid sa ilang balay kaniadto. Nakahukom siya nga pasabton na lang g’yud ang ulitawo.

“Dili ba ikaw ug ang imong ig-agaw nga si Peping pirmi man nga manirador kaniadto sa habog nga pangpang daplin duol sa tinubdan sa tubig? Usa ka higayon niadto nakaigo g’yud mo og usa ka engkanto mao nga nakasinati og grabeng hilanat si Peping nga hapit na g’yud mamatay,” matud ni Dorin.

Inanay nga nakahinumdom si Renante nga dihang gagmay pa tuod sila ang ig-agaw niya nga si Peping namatay na g’yud tungod sa grabeng hilanat. Gibuhatan na gani og lungon apan kalit lang nabuhi.

“Ako ang mihangyo niadto sa engkanto nga naigo sa imong ig-agaw Ren nga buhion lang niya pagbalik si Peping. Ang habog kaayo nga pangpang nga maoy sagad ninyo paniradoran og langgam kaniadto, maoy among gingharian sa mga engkanto,” pasabut ni Dorin.

Nakasabut na paghinay-hinay si Renante nga mao diay nga bisan sa daghan nang katuigan nga milabay, ang daw yellow nga kolor sa anapog nga nagbadlis sa titip kaayong pangpang sa Giloctog wala gayud tuboi og mga lumot kay gingharian diay kini sa mga engkanto.

“Apan nganong daw wala may mga tawo dinhi Dorin kun gingharian kini sa mga engkanto?,” nakapangutana si Renante sa dalaga. “Anaa ra sila sa imong palibot apan dili lang sila gustong magpakita kanimo.” Gipasabot si Renante ni Dorin nga ang kabatoan nga nahimutang duol sa balay sa iyang Lola maoy karsada sa mga engkanto ug didto miagi ang awto nga ilang gisakyan kaganina.

“Dorin, dili ba supak man sa mga engkanto nga makigsuod kamo og mga sama kanamo?” gisukna ni Renante si Dorin. “Tinuod, apan nakasabot ang akong mga ginikanan sa akong gihimo Ren. Mao nga hangyoon ko ikaw nga anhi na lang puyo sa among gingharian,” tubag sa dalaga.

Giingnan si Renante ni Dorin nga kun uyon siya nga adto na mopuyo sa kalibutan sa mga engkanto, mahimo gihapon siya nga makakita sa iyang mga ginikanan ug mga paryente.

Naglibog si Renante ug wala dayon makahukom. Nakabantay siya nga nagsugod na siya pagbati og gugma sa engkantanda. “Sigi Ren, ibalik ko na ikaw sa inyong kalibotan kay gipangita ka na sa imong mga ig-agaw.” Nagkaguliyang na ang mga ig-agaw ug ang mga iyaan ni Renante tungod sa iyang pagkahanaw. Daw kadiyot ra siya didto sa gingharian sa mga engkanto apan duha na siya ka adlaw nga nahanaw sa balay sa iyang lola.

“Uy! Dia ra man lagi ni si Agaw Renante nga naghigda ilawom sa lantay!,” nakasinggit si Peping dihang nakit-an niya nga natulog pa si Renante. (Taposon sunod gula)