GULA 99
“Unsay resulta?” Pakisusi ni Jody sa iyang abogado human ikasilbi ang notisya ngadto nila ni Randy ug Megan.
“Mora’g disappointed kaayo sila, Ma’am,” sa abogado pa. “Gusto silang makigkita sa presidente sa kompaniya -- nimo. May ihangyo tingali sila.”
“Unsay gitubag mo kanila?”
“Wa una ko mopasalig. Kay basin dili ka makigkita nila.”
“Andam na kong makigkita nila, Atty. Legaspi. Ingna sila nga makigkita ko nila ugma gyung adlawa dinhi sa akong buhatan sa UCV Holdings.”
“Ipaabot ko kanila ang maong mensahe, Mrs. Salvador.”
Pagkaugma...
Mibagting ang intercom sa ibabaw sa talad ni Jody. Iya kining gitubag. Ang iya diay’ng sekretarya ang nanawag.
“Nia na sila si Mr. and Mrs. Randy Maglana, Ma’am,” sa kalihim pa.
“Pasudla sila, Miss Bugash,” matud ni Jody.
Dihang gibutang na niya ang intercom, giandam na niya ang iyang kaugalingon. Naghinamhinam na siya sa panag-atubang nila ni Randy ug Megan. -- Sumpayan pa