Mag-boxer unta

Sa nag-edad pa ako og katorse anyos, naaghat gyud ko nga mag-boxer unta. Unsaon, naibog man gud ko sa akong amigo nga si Maro, nga nisikat sa among lungsod, tungod sa ka maayo niya nga mo-boxing. Ug gani kada-away niya ibabaw sa ring permi gyud siyang makadaog.

Kada-Huwebes ang boxing nga ipahigayon sa among lungsod, sulod sa among merkado. Pagka-sunod Huwebes, gikuyogan ko’s akong mga higala. Kay ako man silang gisultian sa akong plano.

Pag-abot namo sa merkado, nakakita dayon ko’g paris. Sus, haska ra ba gyung bahi-ag lawas sa akong kontra kay taga isla man, anad sa panagat.

Maskulado kaayo og lawas, samtang ako mora’g baki sa saging. Nag-yagpis lang ang lawas sa kadaot, unya sip-onon pa gyud.

Sa wa pa ko nisaka ibabaw sa ring, gisikma ko una ang tanang sip-on nga nag-ung-ong sa duha ka lungag sa akong ilong. Basin unya og maoy makasagabal sa akong away.

Nibagting ang unang round. Nindot kaayo akong porma pina-Mohamad Ali. Nagbawosbawos mi’g sukmag sa akong kontra. Ug sa wa ko damha, sa kadugayan nakong sukmag sukmag ngadto sa akong kontra, wa ko kapugngi nga ni-agas pagkalit ang akong sip-on.

Nihunong ko’s akong sukmag kay pahiran ko usa ang akong sip-on sa akong glabs. Apan unsang pagkahitaboa nga nalipat man hinuon ko kay sa paghuman ko’g pahid sa akong sip-on, nisunod man ang kusog kaayong kumo sa akong kontra nga nidapat sa akong ilong.

Maayo gyud nakong pagkalukapa. Nya sa akong pagbarog, adunay daghang basa nga nangagas sa akong ilong. Sa akong pagtuo sip-on gihapon, apan unsa ba, nga sa akong pagpahid dugo naman gud ni.

Nasunggo man diay ko nga naigo sa kumo sa akong kontra. Ni-abliwag ang katawa sa mga manan-away sa ilang nasaksihan. Kay imbis sip-on ang moagas sa akong ilong, napulihan man gud ni’g dugo.

Nisurender ko. Naglingolingo kong ninaog sa ring. Ug sa pag-abot ko sa ubos naka-diseder ko nga dili na lang mopadayon sa akong pagka-boxer. (Kataposan)