Walay kamatayon ang gugma

Gula 98

Napaghilantawan ni Jody nga mao na kini ang maggahas og dalan aron iyang kasudyaan si Randy sa nahimo niining kasal-anan kaniya. Dili kay si Randy ra. Lakip usab ang iyang manghod nga si Megan. Silang duha ang nakaingon sa kamiserable sa iyang kinabuhi kaniadto.

Walay kasayoran sila si Randy ug Megan nga si Jody ang tag-iya sa lending company nga ilang giutangan. Hugot nga gibaoran ni Jody ang iyang mga empleyado nga ililong gayod ngadto kanila ang mahitungod kaniya. Gusto ni Jody nga pakugangan sila inig-abot sa tukmang panahon.

Dihang dako na kaayo’g utang si Randy ug Megan sa iyang kompaniya, gisugdan na ni Jody ang pagpaningil kanila. Apan wala makabayad sila si Randy ug Megan. Dinhi nasuta ni Jody nga napurdoy na gayod diay ang duha.

Dinhi gipalihok ni Jody ang iyang abogado. Giapiki niya sila si Megan ug Randy. Gihikay dayon sa iyang abogado ang mga papeles nga nag-awhag nga kondili makabayad sila si Randy ug Megan sa dako nilang utang, imbargohon sa UCV Holdings nga gipanag-iya ni Jody ang tanan nilang mga propiyedad. -- Sumpayan pa