Gula 97
“U-unsay buot mong ipasabot?” Pakitubod ni Jody.
“Dili kuno maayo’g dagan ang iyang mga negosyo. Ambot, mora’g gidemalas tingali. O wala matarong pagkadumala. Basta, matod ni Megan, hinay kuno kaayo ang ilang negosyo. Ang tanan gyud. Ni Megan pa, mora sila’g gigabaan. Lakip ang realty business ni Randy, nagkahinay na sab. Dako na man gani kuno sila’g utang sa bangko ug ubang pahuwamanan og kuwarta.”
Wala motingog si Jody. Gihinuktokan niya ang ulahing gisulti ni Jasmine kaniya.
“Kanunay na lang kunong magsipok ang ulo ni Randy tungod sa kadako sa ilang utang,” matud ni Jasmine. “Kini kuno ang kanunay mahimong pabilo sa panaglalis nila ni Megan.”
Dihay nindot nga plano nga kalit misantop sa hunahuna ni Jody alang nila ni Randy ug Megan.
Gituman ni Jody ang iyang plano alang nila ni Randy ug Megan. Gipasulod niya og dinagkong transaksiyon sa pangutang ang magtiayon sa lending company ni Mr. Enrique Salvador nga iyang bana nga karon siya nay tag-iya. May order si Jody sa mga empleyado sa lending company nga dili gayod pabalibaron bisan unsa kadako sa kantidad nga utangon ni Randy Maglana. -- Sumpayan pa