Ang kaba-kabang itom

Agosto 22, 2004. Nagpreparar ko sa mga gipangserokan kong mga Sulat-Pahibalo aron sa labing madaling panahon ikahatod ko sa akong mga Kaliwatang Mendoza didto sa dakbayan sa Maasin, Sogod, Bontoc, Macrohon, Padre Burgos, Anahawan, Cabalian, Saint Bernard, Hinundayan, Hinungangan ug Silago. Mga sakop sa Habagatang Leyte.

Kay ako man god ang napili ug nabutohang Clan Secretary sa Mendoza Clan Association sa nakalabay'ng Hunyo 6, 2004 diin ang Headquarters atua sa Brgy. Alejos, Bato, Leyte, Amihanang Leyte. Ug ako ra sab nga nauyonan sa kadaghanan nga maoy Over-all Coordinator. Mao man ganing ako maoy nangunay pagpanghimo sa mga Sulat-Pahibalo ug ako sab nga mohatod sa matag Panagtigom ug Clan Reunion sa nagkadakong kapunongan sa among kaliwatan.

Unya, nahayanghag ko sa usa ka itom nga kaba-kaba nga misulod sa gipuy-an kong balay nga gipanag-iya sa akong ig-agaw nga si Bonnin Mendoza. Milibot-libot kini sa sulod. Matag karon ug unya, motugpa kini sa akong abaga. Wala ko lamang kini panumbalinga. Gipadayon ko ang pagbutang sa mga pangalan sa akong mga kadugo sa ilang tagsa-tagsa ka mga address didto sa mga gipangserokan kong mga sulat-pahibalo.

Pagkahuman sa duha ka mga hugna sa Panagtigom namong mga opisyales ug mga miyembro, nananghid ko sa among presidente sa Clan nga si Segundino "Nanding" Mendoza, Sr., aron modalikyat og duaw sa among dapit sa Balamban, ang harang lungsod sa habagatang lalawigan sa Sugbo, nga maoy namat-an ko’g kahayag ug aron sab makatambong sa tinuig nga pangilin sa maong lungsod -- matag Oktubre 4.

Bisperas sa piyesta nga nahiabot ako sa among dapit, sa Brgy. Abucayan. Paghisulod ko sa among pinuy-anan, gisugat ko sa among kinamanghorang igsoon nga si William.

"Brod, patay na baya si Mama Tanting!"

"U-Unsa?!" nahikurat ko sa gibalita sa akong manghod. Ug nabuhian ko pagkalit ang gibitbit kong travelling bag. "Kanus-a ug unsang bulana namatay si Mama, Dong?"

"Agosto 22, Brod," daling tubag ni William. "Ug atua siya gilubong sa Tagum City Catholic Cemetery. Niadtong Agosto 25,2004, gikuha man god siya sa atong maguwang nga si Kuya Jesus ug nanglarga sila sa Tagum. Ug sa bulan sa Agosto, nagteks si Manang Lily nga namatay si Mama."

"Mao diay?" sa hunahuna ko pa. Ug nahinumdom ako pagkalit sa kaba-kabang itom nga nagpakita kanako niadtong bulan sa Agosto. (Katapusan)