Little black book

Gula 4

Mipahiyom si Noy Gonzalo nga nakadungog sa akong pangutana. Ug niya pa, “namatud-an gyud ang kalig-on sa tinuli nakong tari. Busa kun maalim na kanang samad sa imong tuli, isubo dayon kana.”

Pagpauli nako sa balay, gisuginlan nako si Nanay Piya sa gisulti ni Noy Gonzalo nako. Labihang sukoa sa akong inahan kay gitudloan kuno ko ni Noy Gonzalo og binuang. Nagbagulbol si Nanay Piya.

“Di diay tinuod nga isubo ngadto sa anay o sa tiguwang ang bag-ong tinuli, Nay?” Gisukit ko ang akong inahan.

“Dili kana tinuod,” nagkanayon ang akong inahan. “Ayaw pagtuo ni Gonzalo kay hinudhod nga dako kanang tawhana.”

Dihang grade three na ako, gitap-il tap-il ko sa akong mga classmate ngadto kang Rhoda. Kini si Rhoda classmate sab nako ug maoy muse sa among classroom. Sa sinugdan, miayad ko sa paghatol nako sa akong mga classmate ngadto kang Rhoda. Pero sa kadugayan mora’g nakauyon na man sab hinuon ko sa ilang mga sungog.

Mora’g nakagusto na lang sab ko ni Rhoda bisan sa kalinghod pa sa akong kabuot. Gani, naggambalay na ako’g loveletter nga ako untang isekreto’g pasok sa iyang notebook ug kun iya kining mautingkayan, seguradong iya gyung mabasahan ang akong proposal.

Pero wala nako ihinayon paghatag ang akong loveletter ngadto kang Rhoda. Na-discourage man gud ko dihang nagdula siya og Chinese garter uban sa lain pa namong mga classmate. Nawalis ang iyang sayal ug nakita ko ang lagom niyang underwear, labina ang sa atubangang bahin niini. Ang akong nakita naka-turn off nako. Gigisi na lang nako ang gihan-ay nakong loveletter nga alang unta kaniya.

Dihang grade six na ako, misamot ang akong curiosity ug consciousness bahin sa akong tari. -- Sumpayan pa