Pagbunok sa uwan

Gula 3

Nagdali nga milakaw si Renante paingon sa balay sa iyang Lola sa sitio Ilaya, sakop gihapon sa barangay Giloctog, Barili.

Gihugopan siya sa iyang mga ig-agaw nga nahinangop sa kalit niya nga pagbisita.

“Wala ka maabti adtong kusog kaayong uwan Gaw?” matud sa iyang ig-agaw nga si Joel.

“Nabasa g’yud ko’g gamay Gaw apan nakapasilong ko niadtong payag ug hinungdan nga nahimamat hinoon nako kadtong gwapa nga dalaga,” matud ni Renante.

Ingon sa dili makatoo ang mga ig-agaw ni Renante sa iyang gisulti kay wala sila makasabot niining giingong gwapa nga dalaga sa ilang ig-agaw.

“Wala may mga gwapa nga dalaga dinhi Gaw kay tua man sa dakbayan ang kadaghanan,” matud ni Peping.

Nagkauyon ang mag-agaw nga ilang ubanan si Renante pagbisita ni Dorin didto sa ilang panimalay.

Pagkabuntag, human sila makakaon, nagkuyog dayon ang mag-agaw ug gitultol ni Renante ang dapit diin sila nagbuwag si Dorin nianang miaging gabii.

“Asa gud dapit Gaw nga pangpang man ni dinhi, walay balay dinhi Gaw,” giingnan ni Peping si Renante.

Wala motingog si Renante ug milakaw siya subay niadtong dapit diin si Dorin mipaingon. Apan natingala siya kay habog kaayo nga bato nga pangpang ang maong dapit.

“Kun mao kana Gaw, kinsa man diay kadto si Dorin nga akong gikaromansa ug mitugyan gani sa iyang pagkababaye kanako,” hinay nga pamahayag ni Renante sa iyang mga ig-agaw.

“Pastilan Gaw, tana uy kay manglimbawot man usab ang atong balhibo nimo,” agni sa ig-agaw niya nga si Joel.

Miabot na ang kagabhion ug wala mahimutang si Renante. Wala gayud malaksi sa iyang kaisipan si Dorin. Wala siya makatugkad kun kinsa kini nga babaye nga iyang nahimamat.

Hangtod nga nakatagpilaw si Renante nga naglingkod ug naglantaw niadtong naglugitom nga bukid diin mahimutang ang kahibulongan nga pangpang.

Nahigmata si Renante tungod sa nadungog niya nga tingog nga nagsangpit sa iyang ngalan. Bugnaw ang maong tingog sa babaye nga nagsangpit kaniya.

“Renanteee, Renanteeee,” gikan sa silong sa balay ang tingog. Abtik nga mitimbakuwas si Renante ug gisud-ong sa ubos ug nakita niya ang bayhon sa usa ka babaye.

Gikanaug ni Renante ang nagsangpit kaniya. Nalipay siya kay si Dorin ang iyang nakita. “Tana, ubani ko karon adto kita sa among balay, tana,” gigunitan ni Dorin ang kamot ni Renante.

Wala siya’y nahimo gawas sa pag-uban sa dalaga. (Sumpayan pa)