Pagbunok sa uwan

Gabii na nga miabot si Renante didto sa Barili kay naabereya ang iyang gisakyan. Mobisita siya sa iyang mga iyaan nga nagpuyo sa sitio Ilaya, sakop sa barangay Giloctoc, ang dapit nga pinuy-anan sa iyang inahan.

Misakay si Renante og motorsiklo nga habal-habal apan kutob ra kini sa tiilan niadtong habog kaayong bungtod.

Kinahanglan pa siya nga molakaw og mga tulo ka kilometro, tungas ug lugsong sa kabungturan aron mahiabot siya sa iyang padulngan.

Sanglit dia na si Renante magtrabaho sa dakbayan, wala na siya maanad pagtungas-tungas sa mga bungtod. Unya, kalit lang nga mibunok ang uwan. Hapit na g’yud matumog ang iyang gisul-ob nga T-shirt dihang nakita ni Renante ang usa ka payag-payag dili halayo sa dalan. Nagdali siya pag-adto sa payag ug mipasilong. Nagkakusog g’yud ang uwan. Taud-taud, may nakita si Renante nga usa ka tawo nga kusog kaayong milakaw.

Bisan og may pagka ngitngit na ang panahon, apan naklaro niya nga usa kini ka babaye.

Mipaingon usab sa payag ang babaye aron pagpasilong. “Maayong gabii, pwede mopasilong?,” nabantayan ni Renante nga maanyag ang maong babaye ug daw wala kini magduha-duha pagpasilong sa payag bisan og sila ra ang didto sa maong dapit.

“Maayo kay nakaabot ka dinhi sa payag Miss kay naa o mikusog na g’yud ang pagbunok sa uwan,” giingnan ni Renante ang babaye aron pagbuak sa ilang kahilom.

Igo lang mipahiyom ang babaye. “Taga dinhi ka Miss?,” sukna ni Renante sa babaye. “Naa ra sa kilid anang bungtora ang amo,” matud sa babaye dungan sa pagtudlo sa habog kaayong bungtod nga sa kilid anaa ang titip kaayong pangpang.

Daghan ang nahibulong niining maong pangpang kay bisan sa daghan na kaayong katuigan, apan wala gayud tapti og hugaw ang anapog nga anaa kilid sa pangpang, daw dunay nag-atiman. Nabantayan ni Renante nga gitugnaw ang babaye mao nga iyang gikuha ang iyang jacket sa gidala niya nga bag aron ipasul-ob.

“Palihug isul-ob kining akong jacket Miss para matambalan ang imong katugnaw. Yuna ako diay si Renante,” paila sa ulitawo ngadto sa babaye.

“Ako si Dorinda. Salamat sa imong kaayo ha. Ok ra nimo Ren nga huboon nako ang akong T-shirt kay nag-umog kaayo,” nananghid si Durinda.

“Sige Dorin, walay problema,” matud ni Renante nga nagpasiklap. Atul nga mikalit lang pagkilat og nakita ni Renante nga walay bra si Dorin.

Nakita ni Renante nga naglisud paghukas si Dorin sa basa niyang T-shirt. Iya kining gitabangan mao nga nabantang g’yud kaayo sa iyang panan-aw ang bungtod sa dughan niini. – Sumpayan pa