Walay kamatayon ang gugma

Gumikan sa maong survey, naapektohan gayod ang ubang pamantalaan sa Sugbo. Apan ang Mozart News maoy naigo og maayo sa daotang epekto. Tulin nga mikunhod ang sirkulasyon niini. Namalhin usab ang mga advertisers sa maong pamantalaan ngadto sa Cebu Standard.

Hangtod nga wala na gayod makasugakod ang tag-iya niini sa alkanse. Gisirad-an ang Mozart News ug ang katibuk-ang Broadway Publications.

Wala masirad-i sa hingpit ang Broadway Publications nga nagpatik sa Mozart News kay gipalit kini nila ni Jody. Gisagop ni Jody ang maong publikasyon tungod kay nahinugon siya niini. Ang iyang amahan man gud maoy tag-iya niini kaniadto sa buhi pa kini.

Apan walay kasayoran sila si Randy Maglana nga si Jody maoy mipalit sa Broadway Publications. Ang abogado lang nila ni Jody ug Mr. Salvador ang nakig-atubang sa magtiayon sa pagpahigayon na sa pinalitay ug binayranay. Ang ngalan ra usab ni Mr. Salvador ang makita diha sa papeles sa pinalitay nga gipirmahan nila ni Randy ug Megan.

Dihang napalit na nila ang Broadway Publications gi-merge nila ni Jody ug Mr. Salvador ang Mozart News ngadto sa Standard Publications nga maoy nagpatik sa kaugalingon nilang Cebu Standard. -- Sumpayan pa