Anino sa adlaw

Bisan og klarong wala nay dag-anan, nagpadayon sa pagsukol ang mga rebelde. Nagsinibog sila sa pagpakigsangka sa mga sakop sa militar. Apan wala molugak ang militar sa ilang opensiba. Giapiki nila’g maayo ang mga rebelde. Kay wala man gyud sila’y nakita bisan gamay na lang timailhan nga mosurender ang mga rebelde nakahukom silang todason na lang gyud ang tanang mga walhon.

Tuod man, milampos ang mga sakop sa militar paglampurnas sa mga rebelde. Nagpasad ang mga patay sa taliwala sa lasang. Nakaplagan sa mga sakop ni Maj. Jack Moral si Kumander Abay nga wala nay kinabuhi. Nabuak ang ulo niini. Naguba usab ang dughan ni Ronald Liwanag tungod sa mga bala nga nakaigo ug maoy hinungdan sa kamatayon niini. Natodas gyud ang mga rebelde. Napatay silang tanan sa militar.

Usa ang namatay sa habig sa militar ug may tulo nga samdon. Apan ang tanang mga sakop sa militar nga nakaapil sa pagpakiggubat sa mga rebeldeng gipangulohan ni Kumander Abay gitakdang makadawat og promosyon ingon man pasidungog.

Milabay ang dul-an sa usa ka bulan human sa maong hitabo. Sulod sa maternity room sa usa ka district hospital gihimugso ni Teresa ang usa ka mahimsog nga batang lalaki. Gituman niya ang tugon sa namatay niyang hinigugma nga si Ronald Liwanag nga Averill ang ingalan sa ilang anak. Gipabunyagan gayod niya kini sa ngalan nga Averill. Ang bata maoy buhing handomanan sa gugma nila ni Ronald.

Paglabay sa duha ka semana, nahiduaw si Ricky Liwanag kang Teresa. Nasayod na siya nga nanganak na si Teresa ug gusto siyang motan-aw sa bata. Nahinangop siya dihang iya kining nakita. Liwat kaayo ni Ronald ang bata. Himsog kini. Maskulado nag lawas bisan masuso pa. Mora’g lawas sa usa ka manggugubat.

“Namatay man tuod si Ronald apan dili mapuo ang iyang kaliwat,” nagkanayon sa hilom si Ricky. “Usa ka henerasyon ang moagi apan may laing henerasyon usab nga moabot.” – Kataposan