Huwam-huwam

Gula 2

Nagkatinan-away ang managkumare kay nabantayan nila nga wala na makatultol sa ilang mga asawa ang ilang mga kumpare.

“Yuna mare Brigida, mora’g nangahubog na g’yud tingali kining atong mga bana da kay mora’g wala na makaila kun kinsa ang ilang asawa.”

“Mao g’yud mare, dia ay, imbis anha nimo motupad dia na hinoon kanako mitupad paglingkud si kumpare Valentin, nanimaho lang bino,” nagngisi si Brigida nga mitubag ni kumare niya Lydia.

Si Lydia maoy asawa ni Abraham, samtang si Brigida asawa usab ni Valentin.

Misalga si Valentin. “Walay problema, kita-kita ra ang ania dinhi kay wala man tay mga anak. Sigi mag-inom pa ta, dia pay bino nga among dala ni Pare Abraham.”

Duha ka lapad nga botelya sa ilimnong makahubog ang gikuha ni Valentin gikan sa iyang bulsa sa karsones ug gibutang kini sa lamesa. “Na mangahubog ta ani karon pre Valentin,” matud ni Lydia.

Sa tanto nila nga panag-inom, nanginit na ang ilang kalawasan. Mihinay-hinay na pagsikit ang managkumpare ngadto sa ilang kumare.

Dayon, misinyas si Valentin nga duna siya’y isulti, ilabi na ngadto sa duha ka magkumare.

“Paminaw mong duha Day Brigida ug Mare Lydia. Among gihisgutan ni kumpare Abraham ang problema nato nga wala g’yud kita makabaton og anak bisan giunsa na lang nato pagpaninguha,” pangbukas nga pamahayag ni Valentin.

“Mao g’yud pre, unya pre,” salga ni Lydia. “Duna kami’y nahuna-hunaan nga paagi nga basin kini na ang tubag nga makabaton kita og mga anak,” dugang pamahayag ni Valentin.

“Unsa man kana Valentin?,” sukna sa iyang asawa nga si Brigida, kang kansang kamot gihapyud-hapyud na sa kumpare niya nga si Abraham.

Matud ni Valentin. “Ingon niini, lima na ka tuig nga bisan giunsa na lang nato wala gayud kita makabaton og anak. Kun mosugot kamo, uyon kami si Kumpare Abraham nga magbaylo usa kita og partner karong gabii, aw bisan og sugdan dayon karon.”

Daw sa natuk-an ang magkumare pagkadungog niini, apan maayo nga mipasabot si Valentin. Nanghilom ang magkumare nga Lydia ug Brigida.

“Unsa man ikaw mare Lydia, oki ra ba nimo? Kun ang atong tumong para makabaton ta’g liwat dili ko mosupak,” matud ni Brigida nga nagkapandol-pandol na ang dila sa kahubog.

“Aw na hala, mao man kaha, game!,” matud ni Brigida. Giyarok ni Abraham ang tunga sa baso nga bino ug mitindog. “Tana mare, adto ta sa kwarto, bahala na usab mo si Lydia pre Valentin.” (Sumpayan pa)