Walay kamatayon ang gugma

GULA 89

Gibati niya ang tumang kahinugon nga wala siya makatambong sa paghaya sa iyang amahan ug ingon man sa paghatod niini sa kataposang pahulayan. Apan may lig-on siyang katarongan sa pagbuhat sa ingon. Dili pa siya andam nga makigkita nila ni Randy ug Megan. Ug kining butanga iyang gipangayoan og pasaylo sa ibabaw sa lubnganan sa iyang amahan.

Human makapanguros, miduol si Jody kang Mr. Salvador nga nagbarog sa iyang luyo. Nanglakaw dayon sila paingon sa nahimutangan sa ilang sakyanan nga gi-parking sa gawas nga bahin sa sementeryo.

Diriyot mag-abot sila si Jody ug Megan. Igo lang nakasakay sila si Jody ug Mr. Salvador sa ilang sakyanan, nahiabot usab sila si Megan ug Randy sakay sa kaugalingong sakyanan. Nakita kaayo ni Jody ang pagkanaog sa duha gikan sa ilang gisakyan. Apan wala sila makakita kaniya ug ni Mr. Salvador sanglit tinted man ang bildo sa giluwanan nilang awto.

Gisundan pagtan-aw ni Jody ang duha nga misulod sa sementeryo.

May adlaw ra kamo kanako, bahad ni Jody sa hilom. Unya giingnan niya si Mr. Salvador nga mamiya na sila sa sementeryo. -- Sumpayan pa