Gula 71
Gituman sa kagamhanan ang paghatag ngadto sa mga rebel returnees sa gisaad nga mga benepisyo alang kanila. Gipatambalan ang nagmasakiton nga rebel returnees. Gihatagan sila’g yuta nga matikad ug balay nga kapuy-an. Gihatagan sila’g kapanginabuhian ug gibayran sa kagamhanan ang matag armas nga ilang ikauli sa ilang pagsurender. Gikalipay kini sa mga rebel returnees nga gusto nang magbag-o sa ilang kinabuhi.
Sa walhong pundok nga gipangulohan ni Kumander Abay, usa lang sa iyang mga sakop ang nakahukom pagbalik sa sabakan sa kagamhanan. Si Ka Martin. Girespetohan nila ang desisyon ni Ka Martin maong gipasagdan nila siya nga mosurender. Gawas kang Ka Martin, ang tanang mga sakop ni Kumander Abay milig-on sa ilang panumpa nga magpabilin sa bukid aron ipadayon ang ilang kawsa pagbugtaw sa kaangayan ug kausaban.
“Samtang aduna pay bukid nga atong katagoan,” ni Kumander Abay pa. “Ipadayon nato ang atong kawsa. Ipadayon nato ang pagpakiggubat sa gobyerno.”
“Mabuhi ang rebolusyon!” Giisa ni Ronald ang gigunitan niyang armas.
“Mabuhi!” Tubag sa mga rebelde dungan sa pag-isa usab sa gikuptan nilang mga armas nga tag-as og kalibre. -- Sumpayan pa