Walay kamatayon ang gugma

 Gula 88

“Moduaw ka sa iyang haya?” Gipangutana si Jody ni Mr. Enrique Salvador sa ilang panag-abot sa paghiuli na nila sa balay gikan sa tagsatagsa nila ka trabaho.

Nasayod na usab si Mr. Salvador sa nahitabo ni Mr. Luis Garcia.

“Dili ko,” mubo niyang tubag. “Wa koy daotang kabubut-on ni Daddy. Di lang ko gustong makakita sa panagway nila ni Megan ug Randy. Makasabot tingali si Daddy nako. Moduaw lang unya ko sa iyang lubong kun makahigayon.”

“Ikaw ang mag-igo.”

“Gusto sab ko nga magpabilin sila si Megan ug Randy nga walay kasayoran kun hain ako karon aron makugang sila sa higayon nga magkaatubang kami pag-usab inig-abot sa tukmang panahon.”

Nahitutok si Mr. Salvador kaniya. Ingon sa nagatugkad kini sa salabtonon niyang sinultihan.

Nabalitaan ni Jody nga gilubong na si Mr. Luis Garcia. Paglabay sa tulo ka adlaw, miduaw siya sa lubong niini sa Manila North Cemetery sa Liloan. Gikuyogan siya ni Mr. Enrique Salvador.

Midagkot siya’g mga kandela sa ibabaw sa lubong sa iyang amahan ug militok og pipila ka pulong sa pag-ampo alang sa malinawong pagpahulay sa kalag niini. Wala niya kapugngi ang pagpanglugmaw sa iyang mga luha samtang ingon sa nakigsulti siya sa hilom sa lubong sa iyang daddy. -- Sumpayan pa