Maninintal

Gula 7

CEBU, Philippines - Sa tantong dagan ni Loida, nadagma siya. Gilingi niya ang iyang gigikanan ug nakita niya ang nagkaduol nga huwes.

Gihurot ni Loida ang iyang tingog sa pagsinggit og tabang. Gikaluy-an si Loida kay dunay mga tawo nga nakadungog ug nagdagan nga mipaingon sa iyang nahimutangan.

Nalantawan niya nga mibalik ang huwes sa beach house. “Tabang, tabang, buot ko nga lugoson adtong tawhana,” nagkaputol-putol ang pagsulti ni Loida tungod sa kakapoy.

Duha sa tulo ka lalaki ang dali nga migukod sa huwes samtang ang usa mitabang ni Loida sa pagpatindog. “Hunong, hunong, ayaw na pagdagan!,” gisinggitan sa duha ka lalaki si Judge Ticman.

Misukol unta si Judge Ticman ug dili gustong magpadakop apan nakulatahan hinoon siya sa duha ka tawo. Taud-taud nahiabot si Loida ug ang lalaki nga mialalay kaniya.

“Siya, siya ang buot molugos nako, tabangi tawon ko,” nagkurog si Loida nga nangayo’g tabang sa tulo ka lalaki.

“Tanod ming duha Day ug polis kining usa nako ka kauban,” nagpaila ang tulo ka lalaki.

“Pamahawa mo dinhi, ayaw mo pagpanghilabot. Managhinigugmaay kami ug nagkaaway lang, ayaw kami’g hilabti,” gisuwayan sa huwes paglingla ang tulo ka tawo, apan misinggit si Loida.

“Ayaw kamo pagtoo, dakpa ninyo siya!” naghilak na si Loida. Giposasan dayon sa tulo ka tawo si Judge Ticman nga wala magpaila nga usa siya ka huwes.

Didto siya gidala sa opisina sa Mariwasa Beach Resort. Ang mga kawani abtik nga nanawag og polis. Gidala sa police station sa Lapulapu City si Judge Ticman ug didto na nahibaw-an nga usa siya ka huwes.

Nangabut ang mga news reporters didto sa police station. Nagpunsisok ang mga tawo sa gawas pagkasayud nga huwes nadakpan sa pagsuway’g lugos og babaye.

Pagka ugma, gihimong sumsoman sa media ang pagkasikop ni Judge Ticman.

Miabot didto sa police station ang ig-agaw ni Loida nga si Lorna. Midiritso kini sa prisohan. “Kumusta ka Judge Ticman. Mao na kini ang bugti sa imong kalampingasan sa mga babaye.”

Wala motubag ang huwes. Gipasakaan g’yud siya og kaso ni Loida.

Gipaspasan ang paghusay sa kaso ug nakonbikto g’yud ang palakero nga huwes sa kaso nga attempted rape. Gamay ra hinoon ang silot nga iyang atubangon, apan gitaktak si Judge Ticman sa Supreme Court sa pagka huwes. (Katapusan)