Walay kamatayon ang gugma

 Gula 87

 CEBU, Philippines - Kalit gikulbaan si Jody. Gidali niya pagpakli ngadto sa ikaduhang panid ang pamantalaan aron basahon ang estorya sa umbrella headline.

Tuod, wala siya masayop. Ang iya gyung amahan maoy gipasabot sa headline. Patay na ang iyang daddy. Cardiac arrest ang hinungdan sa kamatayon niini.

Nakahilak si Jody sa maong kasayoran. Bisan sa gibuhat sa iyang amahan nga pagsalikway kaniya apan wala siya magbaton og kasilag ngadto niini. Gimahal gihapon niya ang iyang daddy.

Gitibawas niya pagbasa ang katibuk-ang estorya sa kamatayon sa iyang amahan dihang mituang na og diyotay ang iyang mga luha. Wala gayoy hisgot bahin kaniya sa balita. Pulos lang bahin kang Megan. Mora bag si Megan ray anak ni Mr. Luis Garcia.

Nahisgotan sab sa maong balita si Randy Maglana. Mao pa masayod si Jody nga nagminyo gayod diay sila si Randy ug Megan. Wala gayod kapugngi sa ilang amahan ang pagpamiga sa iyang manghod ngadto sa lalaki nga wala magustohi niini.

Maayo pa si Randy kay nahisgotan pa sa balita. Apan si Jody wala gyud malakbiti. Nahiubos si Jody sa maong hitabo. -- Sumpayan pa