Maninintal

Gula 7

Dali ra sila nga miabut sa usa ka hilit nga beach resort didto sa barangay Mactan.

Halos dili kalahuson si Loida pag-uban sa huwes sa beach house kay gikulbaan siya nga nagtan-aw sa kangiob sa maong dapit.

Apan nahuna-huna niya nga kun mobalik siya, asa man siya mopaingon niadtong orasa sa kagabhion.

Gipaundayonan na lang niya si Judge Ticman. Gialalayan siya sa huwes sa paglakaw kay ang ila diay’ng beach house nga adtoon, dili na kabahin sa Mariwasa Beach resort.

“Uy judge, nagabhian ka man? Gitawagan ko ni Sir William nga moanhi ka kuno mao nga giandam na nako daan ang beach house Judge,” matud sa caretaker sa beach house.

Gitunolan ni Judge Ticman og kwarta ang caretaker ug gisugo pagpalit og makaon alang kanila ni Loida. “Tana Loids, maligo na ta. Pag-ilis didto sa kwarto, dunay mga extra swim suit nga naa sa locker.”

Apan mibalibad si Loida. “Dili na lang ko maligo Judge. Gitugnaw ko.”

Miabut ang caretaker nga nagdala sa mga pinalit nga makaon ug pipila ka botelya sa bugnaw’ng softdrinks. “Kamo na lang dinhi Judge, mopauli usa ko sa balay,” matud sa caretaker.

Nangaon sila si Loida ug Judge Ticman. Human sa ilang pagpangaon, samtang naglingkud si Loida sa lingkoranan nga naglantaw sa naglugitom nga kadagatan, mitupad kaniya paglingkod ang huwes.

Misibog si Loida, apan midip-ig g’yud kaniya si Judge Ticman. “Nahadlok ka ba nako Loids?”

“Dili lang ta magsikit paglingkod Judge, mahimo ba?” giingnan ni Loida si Judge Ticman. Apan inay mopatuo, gigakos hinoon si Loida sa huwes mao nga napugos sa pagkisi-kisi ang gwapa nga Boholana.

Nagkahugot ang paggakus ni Judge Ticman ngadto kang Loida ug giguroy na kini ngadto sa sulod sa kwarto.

Gipugngan ni Loida ang pagsinggit apan gipaninguha niya nga makalingkawas sa gakus sa huwes nga ingon sa gipanuwayan na.

Gidat-ogan na siya sa huwes ug gipanghiram ang pribadong parte sa iyang kalawasan, dayon giukoban ang iyang mga ngabil. Naghangus si Loida nga misinggit og pakitabang.

Apan kusgan kaayo ang mga bukton sa huwes nga mipugong kaniya. Sanglit nagsayal ra si Loida, dali ra nga nahukas ni Judge Ticman ang iyang gisul-ob nga panty. Sa dayon nang hushos sa huwes sa iyang panty, nakahigayon si Loida pagsikad og kusog sa nawong sa huwes.

Dali nga migawas si Loida sa pultahan ug nagpaninggit og panabang. Gigukod siya ni Judge Ticman. Nagkapagaw si Loida nga nagpanawag og tabang. (Sumpayan pa)