Maninintal

Gula 6

Hinayon nga manulti si Judge Padilla apan nakalitan sila si Lorna ug si Dennis kay isog na kaayo ang huwes.

“Ayaw mo lihok diha sa inyong nahimutangan ha? Walay molihok, diha ra mo!,” misinggaak ang tingog sa huwes. Gisugo sa huwes ang kauban niining drayber nga motawag og gwardya.

Wala madugay, diha na ang gwardya kauban sa drayber sa huwes. “Hala, dakpa ninyo kanang duha ka mga walay uwaw nga kawani sa korte,” matud sa huwes nga mitudlo sa hubo pa nga lawas nilang Lorna ug Dennis.

Gigamit sa huwes ang iyang camera sa cellphone sa pagkuha og ebidensya sa naaktohan niya nga salawayong buhat sa duha niya ka staff sa korte.

Pagkaugma, nagbansiwag ang balita sa mantalaan kabahin sa duha ka kawani sa korte nga nasakpan sa huwes nga naghilawas. Nasagap sa mga reporters ang balita kay gipa-blotter man kini sa huwes sa kapolisan.

Nasayud nga lig-on kaayo ang ebidensya sa huwes kay nakakuha man kini og hulagway kanila nga naghimo sa salawayong buhat, wala na lang sila mosukol og kaso.

Gitaktak sila si Dennis ug Lorna sa ilang trabaho pinaagi sa kamandoan sa Supreme Court nga gibasi sa rekomendasyon ni Judge Padilla.

Hilom unta nga makigkita si Lorna kang Judge Ticman aron magpatabang sa pagpangita og trabaho, apan wala na siya atubanga pa sa huwes.

Nakapanganti si Lorna nga manimalos ni Judge Ticman kay mao kini ang nakapahimo kaniya nga dautan. Gipukaw sa huwes ang iyang kauwaw sa lawasnong kalipay.

Miuli si Lorna sa ilang dapit sa Bohol. Gikakita niini ang iyang maanyag nga ig-agaw nga babaye. Wala niya tug-ani sa tinuoray’ng nahitabo kaniya pagpanimpalad dinhi sa Sugbo.

Giagni niya ang ig-agaw nga si Loida nga moaplay sa bakanteng pwesto nga iyang gitalikdan sa sala ni Judge Ticman. Tuod man, miaplay si Loida sa maong posisyon.

Giduol niya si Judge Ticman. Halos nagtulo ang laway sa palakero nga huwes nga nagsud-ong sa kaanyag ni Loida. Gipasaligan dayon niya ang dalaga nga iyang tabangan aron madawat sa giaplayan nga posisyon. “Pwede ka ba nga maimbitar og pagpanuroy? Disco hilig ka ba Loida?” matud sa huwes.

Aron lagi madawat sa posisyon nga giaplayan, gitangdo ni Loida ang pagdapit sa huwes. Nakigpanuroy g’yud siya sa huwes pagka gabii ug didto na sila sa kan-anan sa Busay nga gikan-an nila kaniadto ni Lorna.

“Gikan dinhi mangadto ta sa beach sa akong higala,” giingnan ni Judge Ticman si Loida. Dunay dautang plano ang huwes ngadto kang Loida ug plano niya nga adto himoon sa beach. (Sumpayan pa)