Gula 66
Human kasiloti ang tanang gitumbok nga makasasala, si Ronald mihinok sa pagpakigkita kang Ricky. Gitug-anan niya ang iyang maguwang nga nasilotan na ang mga responsable sa kamatayon sa ilang mga ginikanan. Mitud-an sab siya ngadto kang Ricky nga siya gyud ang nangunay pagpunggot sa liog ni PO2 Alexander Savedra.
“Grabe na ang imong gibuhat, Ronald,” nagkanayon si Ricky. “Daw sa dili ko makatuo nga makahimo ka’g ingon niini.”
“Angayan si Alexander Savedra sa maong matang sa silot, Manoy,” giingnan niya ang iyang maguwang. “Iyang gihikawan ang atong mga ginikanan pagsud-ong bisan sa anino na lang sa adlaw, busa angay lang usab nga lugtabon ang iyang kinabuhi.”
Ang sunod nga gihukman sa walhong grupo nga pahamtangan sa kamatayon mao ang mga responsable sa paglugos kang Ka Brenda. Sukad gipakanaog ang verdict batok sa walo ka rapist, kanunay nang gisundan sa mga rebelde ang kalihokan sa maong mga lalaki. Hangtod nga usa ka higayon niana, nalaang gayod nila ang mga makasasala.
Sila si Ronald, Ka Martin ug Ka Henry maoy mihukom sa kinabuhi sa pito ka barkada ni Eliesar Savedra kinsa maoy mastermind sa pag-gang rape kang Ka Brenda. Si Ka Brenda gayod ang nangunay pagpatay kang Eliesar. Dili pa igo, giputlan niya sa kinatawo ang walo ka rapist nga miamong-among kaniya. -- Sumpayan pa