Maninintal

Gula 2

Gikulbaan si Lorna apan wala siya’y mahimo gawas sa pagtuman sa mando sa huwes.

Mikuha siya og bondpaper ug ballpen nga suwatan kun unsa may ipasuwat ni Judge Ticman.

Hinay nga misulod si Lorna sa chamber sa huwes. “Diri lang lingkod tupad nako Lorn para klaro nimo nga madunggan ang akong ipasuwat,” matud sa huwes. Taas-taas na og nadiktar si Judge Ticman dihang miingon kini nga mopahuway usa sila kadiyot.

“May hinigugma ka na ba Lorn?” gipangutana sa huwes ang kawani sa korte. “Duna na kaniadto Judge pero nagkabuwag na mi kay abubhoan kaayo,” dali nga tubag ni Lorna.

“Mahimo ba og imbitahon ko ikaw og dinner unya? Ayaw ko’g balibari Lorn ug isipa nga ako kining blow-out nimo atul sa first day nimo sa trabaho,” matud sa huwes.

Mobalibad unta si Lorna apan gidaug siya sa kaikog sa huwes. Dihang mi-alas singko na sa hapon, nangandam na pagpauli ang ubang kawani sa korte, apan si Lorna nagsigi pa sa iyang gitrabaho.

“Tana Lorn uy, ugma na kana tiwasa,” matud ni Loren nga kauban ni Lorna sa korte. “Sige lang Loren, una-una lang kamo kay gipadali kini ni Judge ang iyang gidektar, wala pa gani siya mopauli.”

Si Lorna na lang ang nahabilin sa korte samtang padayong nag-encode sa computer sa gidektar sa huwes. Taud-taud, migawas si Judge Ticman sa iyang chamber. “Pahibaw-a lang unya ko Lorn kun human ka na kay mag-dinner na ta.”

Hapit na mo-alas sayes nga nahuman ni Lorna ang iyang trabaho. Atul usab nga migawas na si Judge Ticman sa iyang chamber nga nagbitbit sa iyang laptop bag. “Tana Lorn, i-treat tika og dinner,” matud sa huwes dayong gawas sa staff room sa korte. Si Lorna maoy mi-lock sa pultahan.

Misakay si Lorna sa sakyanan ni Judge Ticman nga dunay plaka nga “16” nga nagpasabut nga sakyanan kini sa huwes. Didto sila mipaingon sa usa ka ilado nga kan-anan sa barangay Busay. Nagsugod na pagsiga ang mga suga sa kabalayan ug mga building.

Nalingaw kaayo si Lorna nga nagtan-aw sa mga suga nga lainlain ang kolor. Sanglit taga Leyte si Lorna, karon pa siya makakita sa katahum sa dakbayan panahon sa gabii.

Sama sila sa managhigugmaay nga nagdeyt pagpangaon kay ang ilang suga kandila ra diha sa ilang lamesa ug giabagan ra sila sa dan-ag sa sugang-dagitab didto sa layo.

“Ayaw kahadlok nga makig-uban nako Lorn ha kay wala ko’y asawa,” giingnan ni Judge Ticman ang iyang clerk. “Mao ba Judge? Nahadlok bitaw ko kay basin makit-an kita sa imong asawa,” dali nga tubag ni Lorna nga nagpahiyom.

Gigunitan sa huwes ang kamot ni Lorna. “Gikan dinhi, isuroy ko ikaw sa TOPS, mas nindot pa g’yud didto ang imong makita Lorn,” matud sa huwes.  Sumpayan pa