Anino sa adlaw

Gula 63

“Mao kanay hinungdan nga nagpabukid ko,” nagkanayon si ka Brenda. “Kuwang ko’g pagsalig nga mahatagan og hustisya pinaagi sa balaod sa patag ang akong gidangatan busa nakahukom kong pangunayan ang pagsilot sa mga makasasala.”

“Nakaila ka ba sa mga lalaki nga nanamastamas nimo?” Gipangutana ni Ronald si Brenda.

“Oo,” matud ni Brenda. “Si Eliesar Savedra ug ang pito niya ka barkada.”

“Eliesar Savedra?” Pamilyar ni Ronald ang maong ngalan.“Ang igsuon ni PO2 Alexander Savedra nga sipsip kaayo sa mayor sa atong lungsod.”

“Oo,” ni Brenda pa. “Abusado kaayo kanang tawhana, nagsalig sa iyang maguwang nga polis nga suod kaayo sa mayor. Bisan og suspendido pa ang mayor apan may impluwensiya gihapon kini. Busa nakahukom kong pangunayan ang pagpangita sa hustisya sa akong gidangatan.”

“Wa ka masayop sa imong hukom, Ka Brenda,” ni Ronald pa. “Dinhi sa bukid daghan mi nga mounong nimo. Daghan mi nga motabang nimo pagpaningil sa mga utangan ug pagpangita sa hustisya nga gusto mong maangkon.”

Pag-abot sa adlaw’ng Sabado, nananghid si Ronald kang Kumander Abay nga molugsong siya sa patag aron pagduaw kang Teresa. Nasayod na ang Kumander nga nagsabak ang iyang hinigugma maong gitugotan siya niini nga makalugsong sa patag sa walay daghang kutikuti. Apan gipakuyogan siya’g lima ka kaubang mga rebelde. -- Sumpayan pa