Anino sa adlaw

Ikaw na lay lahos ngadto sa lungsod,” giingnan siya sa usa sa mga rebelde nga mihatod kaniya. “Anhi ra kami kutob dinhi.”

“Salamat sa inyong paghatod nako,” ni Ricky pa. “Palihog ingna si Ronald nga mag-amping kanunay ug nga pinangga ko siya.”

“Makalaom ka nga makaabot sa imong manghod ang imong tugon,” matud sa rebelde.

Dihang mibalik na ang mga rebelde sa ilang agi, misugod usab dayon si Ricky og lakaw paingon sa lungsod. Gipaspasan niya ang iyang mga lakang aron makaabot pa siya sa oras nga isugod sa iyang tulumanon sa radyo.

Nanglabay ang mga adlaw. Si Ricky Liwanag nagpadayon sa naandan niyang mga buluhaton isip usa ka ligdong nga sakop sa media. Sa walay pagkapuol iyang gibulgar ug gisaway ang daghang kahiwian sa gobiyerno. Gibisto niya ang lapad nga pangurakot nga nahitabo sa lainlaing buhatan sa kagamhanan.

Sa bukid, nagpadayon sab ang kalihokan sa walhong pundok. Dunay nangabot sa ilang kampo nga bag-ong mga recruit. Mokabat sa bayente ang nangabot ug ang tulo niini mga babaye nga kanhi aktibista sa tagsatagsa nila ka tulonghaan.

Usa sa mga babaye nga bag-ong recruit mao si Ka Brenda. Nakahatag og interes kang Ronald ang maong babaye kay sukad sa paghiabot niini sa kampo, kanunay lang kini niyang makita nga maghinuktok. Maong usa niana ka higayon, iya kining giduol ug gipakigsultihan. Nagkasuod sila. Hangtod nga iyang nasayran nga ang maong babaye usa diay ka rape victim. Mikompisal kini kaniya sa mapait niining kasinatian sa mga kamot sa mga hakog sa unod nga mi-gang rape kaniya. -- Sumpayan pa