Sa bung-aw sa pagpakasala

Usa ka higayon naminaw ko sa paborito kong radio station ug sa paborito kong an-nouncer nga si John Tam sa iyang programang magpatukar sa mga maanindot nga music ug magbasa sa mga greetings nga gipadala pinaagi sa pagteks sa selpon.

Nakahunahuna ko nga mopadangat sab og greetings ngadto sa akong suod nga higalang si Ronnie sa Bagumbayan, Maribago, dakbayan sa Lapulapu ug sa akong ig-agaw'ng si Israel sa Quiot, Pardo. Unya akong gipakapinan og mensahe nga wanted texmet knang bbaye 40 above.

Igo nga natapos ang programa ni John Tam nagpusot-pusot ang mga mensahe nga nanulod sa akong selpon. Ang duha lang nga akong gi-phone book ang numero mao sila si Jecel nga taga Talamban ug ang usa si Emma nga taga Lapulapu City ra sab.

Dili na lang unta ko magpakabana kay akong nahanduraw ang akong pamilya sa Negros apan kay si Emma kanunay man gyong moteks nako mao nga naaghat nalang sab ko sa pagpakigtubay kaniya ug diha pay higayon nga bag-o kong naka-load ako siyang gitawagan.

"Hello... si Emma 'ni?" Naghinamhinam ko.

"Yes... si Fredmon 'ni?" Nindot kaayo ang iyang tingog.

"O." Ug ako siyang gitug-anan sa akong edad.

"Mao ba? Parehas ra diay tag edad, Fred."

"Aw, payits diay kaayo. Are you single?" Dugang kong pangutana.

"Nakatag-an ka, Fred."

"Ikaw, Em, diin dapit sa Lapulapu ka?"

"Ah, unya na lang na, Fred. Magkita usa ta."

Mora ko’g natuk-an. Higayon na unta nga makairing-iring ko kay mituo ra ba siya nga akong giingnan nga ulitawo pa ko.

"Fredmon," mipadayon si Emma. "Magkita ta ugma sa alas 5:00 sa hapon sa gawas sa Gaisano Grand Mall sa Basak. Magtiksanay lang nya ta aron magkaabot ta, oks?" Ug gi-off ni Emma ang iyang selpon.

Pagkagabii wa ko mahimutang. Nagdibal ang akong hunahuna. Pakigkitaan ko ba kaha si Emma? Nakahukom na ra ba unta kong moapil anang iring-iring kay atua man lagi sa halayo ang akong asawa ug mga anak.

"A, bahala na! Makigduwa ko’g laing team." Nakatuaw ko dayon higda aron matulog na.

Apan wala magdugay mitig-ik ang akong selpon. Dunay nagteks. Nagdali ko basig si Emma na sab. Apan lahi nga numero ang nahitatak. Dili sab ang numero sa simpack sa akong asawa ug anak sa Negros. Akong gibasa.

"Fredmon swldo n nimo? W n mi konsumo diri s Negros nigamit lang gani ko’s selpon sa among slingan."

"Bangas ka!" Nakatuaw ko. Unya akong gipangita ang ngalan ni Emma sa phone book sa akong selpon ug akong gi-delete. (Kataposan)