Palakero nga huwes

Gula 9

Miabut na g’yud ang adlaw nga moatubang na si Judge Bart sa Court Administrator aron tubagon ang iyang kaso. Mas una nga nahiabot didto si Mr. Sing uban sa iyang abogado nga si Atty. Razon. Halos dili makatutok si Bart kang Mr. Sing nga hait kaayo og tinan-awan kaniya.

Dunay baga nga folder sa mga dukomento nga gitunol si Mr. Sing ngadto sa Court Administrator.

Mga return checks kini sa bangko nga nagmatuod nga si Bart nagdawatan og P50,000 matag buwan gikan sa kompaniya ni Mr. Sing.

Wala g’yud makapanghimakak si Bart sa kamatuoran nga lima ka tuig na diay siya nga nagdawat og retainer fee gikan ni Mr. Sing.

Gisukna sa Court Administrator si Mr. Sing kun duna pa ba siya’y dugang ebidensya nga ipresentar aron pagpalig-on sa kaso batok sa huwes.

“Your Honor. If the honorable Court Administrator will allow us, we are happy to present before this Court our vital witness against the respondent,” matud sa abogado ni Mr. Sing.

“Granted,” mubo nga tubag sa Court Administrator. Nakurat si Bart kay nakita niya nga misulod sa court room ang mabdos na nga si Gina.

Mitistigo si Gina nga dihang nagka-relasyon pa sila si Bart, ang huwes mismo ang mitug-an kaniya nga may gidawat kini nga retainer fee gikan ni Mr. Sing, ang tag-iya sa hotel nga pirmi nilang adtoan.

Gihangyo ni Atty. Razon ang Court Administrator nga ipakita nila ang video footage sa hotel nga nagpakita nga tinuod nga si Bart ug Gina nagkauban didto sa makadaghan nga higayon.

Miuyon ang Court Administrator sa awhag ni Atty. Razon. Sa laktud, bug-at kaayo ang ebidensya batok ni Bart. Girekomendar g’yud sa Court Administrator ngadto sa mga Justices sa Supreme Court nga si Bart taktakon sa serbisyo.

Paglabay sa tulo ka semana, gitaktak g’yud sa Supreme Court pagka huwes si Bart. Lakip ang iyang mga benipisyo unta nga dawatonon, dili na ipahatag kaniya.

Matud sa Supreme Court nga ang pagkatawo ni Bart dili haum nga tugyanan sa katungdanan nga girespitohan sa katawhan. Gitangtangan usab si Bart og katungod nga makapanglaban isip abogado.

Usa ka adlaw niana, nakit-an ni Gina si Bart nga lago na og panapot nga naglakaw atubangan sa Kapitolyo.

Nagkatinan-away sila si Gina ug Bart. Apan wala na siya tagda pa sa dalaga nga dali nga misakay sa maanindot niya nga service vehicle.

Gigantihan ni Mr.Sing si Gina tungod sa iyang pagsaksi batok ni Bart. Gitudlo si Gina nga manager sa usa ka kompaniya ni Mr. Sing. (Katapusan)