Tinago nga panagtigum

Ning sayong kahaponon sa adlaw'ng Sabado, dunay gipatawag nga PTA Meeting ug close door conference sa Maritrans Academy, Pagsabungan, Mandaue. Mahitungod ni sa mga reklamo sa mga estudyante, mga ginikanan ug mga yaya, batok ni Miss Carol Burgos dagang guwang nga maestra.

Hilom ug sekreto ni nga panagtigum kay di gusto ang mga kadagkoan sa PTA nga masayran sa Director sa Academy. Pipila lang ka opisyal sa PTA ang nasayod niini. Usa si Mrs. Digna Lipang nga maoy nangulo ining tigoma. Dili sila gustong matsismis ang problema.

May pipila ka mga ginikanan ug yaya ang nanambong sa meeting. Sila si Jerome Bertes ug iyang kapikas nga si Mary Jane; si Romeo Brusas ug kapikas nga si Mary Grace; Jomar Suprema ug kapikas nga si Norelyn; Richard Dagoc ug kapikas nga si Marivel. Si Teddylyn Reyes ang nangulo sa mga yayang nanambong.

Alas dos sa hapon gipahigayon ang meeting sulod sa Auditorium sa naasoy'ng tunghaan. May gisangunan sa pagbantay sa pultahan nga way makasulod nga way labot sa meeting. Wa gipadala ang mga bata kay di pa sila kasabot sa hisgutan.

"Miss Burgos. Nasayod ka ba sa hinungdan kun nganong gipatawag ning mitinga?" ni Mrs. Lipang dihang nagkapundok na silang tanan ug wa nay gipaabot. Doctor of Education si Mrs. Lipang ug usa siyas magtutudlo dinhi. Naglibot lang silag lingkod sa dako ug taas nga lamesa ibabaw sa bantawan. Nahilom ang tibook auditorium. Interesado ang tanang nanambong sa tubag ni Miss Burgos.

"Duna koy nadungog nga may reklamo batok nako. Apan aron matataw nako, sultihi na lang ko, palihug," ni Ms. Burgos.

May pipila ka gagmay'ng lusok sa singot nanurok sa iyang agtang. Bisag bugnaw ang auditorium kay may aircon.

"May mga estudyante nimo sa kinder 1, ilang mga yaya ug mga ginikanan, nga ni-greet nimog good morning. Wa gyud kay response. Kahilom, mug-ot o isnab imong tubag. Niingon na lang ang mga bata nga di na lang sila mo-good morning nimo kay di ka man motingog. Tarong ba na?" ni Mrs. Lipang nga daw nagmaymay og bata.

"Pirmi man god kong sapoton. Problemado ko kanunay sa amo. Sa akong mga igsoon, mga bayaw ug mga pag-umangkon!" ni Ms. Burgos. Niping-it. Daw kahilakon.

"Di ba ang maestra, modelo sa iyang mga tinudloan? Di lang kay sa leksiyon, hasta sa maayong pamatasan?" ni Mrs. Lipang. Niyango si Miss Burgos. "Kun ngil-ad imong ipakita sa mga bata, ngil-ad maoy ilang makopya gikan nimo!" ni Mrs. Lipang. Niduko si Miss Burgos. 

"Duna lang koy pipila ka pangutana nimo Ms. Burgos. Do you love your job?" ni Mrs. Lipang.

"Yes, ma'am" ni Ms. Burgos.

"Are you happy with your job?"

"Yes ma'am."

"Do you enjoy doing your job?"

"Yes, ma'am"

"But you did not show your good feelings to your students! You have to show it! Otherwise, we will not believe everything you said. Ayaw dad-a sa trabahoan ang problema nimo sa panimalay! Segurado gyung dautan ang resulta!"

"What can you say about their complaints?"

"I promise to change my attitude".

"We hope you will keep your promise. How long we will have to wait for you to fulfil it?".

"First hour in the morning of next week".

"Good. We will place you under observation within one month. If there is no positive result after that, we will be forced to report you to Director Edward Cuenca. Are we clear and understood?"

"Yes, ma'am. I'm so sorry. I want to apologize to the parents and the yaya" ni Ms. Burgos.

Giduol niya tagsatagsa ang mga inahan, amahan ug mga yaya. Nangayo siya’g pasaylo nila. Mapaubsanon iyang hitsura. Dili na mug-ot o isnab.

"It's alright now Ms. Burgos. I know you learned from your mistake" ni Mrs. Lipang. Nipahiyom na. Nipahiyom na sab ang mga ginikanan ug yaya.

"Reminder to everyone here. What were said and done here will remain here. Nothing will be said outside. Do I have your commitment?" ni Mrs. Lipang. "Everyone?"

"Yes, madame!" Yes madame! Yes madame!" hapit magdungan ang grupo sa mga opisyales sa PTA ug mga yaya ug ginikanan.

"Good! Meeting adjourned" ni Mrs. Lipang. Hilom ug hinay silang nanggawas tagsatagsa sa auditorium. (Katapusan)