Anino sa adlaw

Gula 56

Tuod man, namatud-an nila nga may mga armadong tawo gayod sa maong lugar. Ilang gikasangka ang maong mga tawo. Kapin sa katunga sa gidaghanon sa gidudahan nilang mga sakop sa walhong pundok ang ilang napatay. May mga samdon usab nga nakaikyas nga gipadayon nila sa paggukod. Usa ray nasamdan sa habig sa militar.

Ang nakaapan lang kay nakaanig pagsaway sa taga media ang maong operasyon sa kapolisan. Aduna man guy duha sa ilang napatay nga giingong dili kauban sa mga rebelde nga mao ra untay ilang tuyo. Gikondenar sa mga ginikanan sa mga biktima ang gibuhat sa militar. Dili makadawat ang mga ginikanan sa kamatayon sa ilang mga anak.

Dugang niini, may mga molupyo usab sa dapit nga nakatug-an ngadto sa media nga aduna untay tulo ka rebeldeng samdon nga gusto nang mosurender apan gitiwasan kini sa mga sakop sa militar. Tungod niini, gikuwestiyon sa Commission on Human Rights ang gibuhat sa militar. Misamot ang kainit sa maong isyu tungod sa pag-sensationalize niini sa media. Nahimo kining dako nga kontrobersiya.

Usa sa mipalanog og init nga mga komentaryo kalabot sa maong isyu mao si Ricky Liwanag. Gisaway niya ang gibuhat sa militar. Alang niya, dili makataronganon nga tiwasan pagpatay sa militar ang usa ka rebelde nga dili mosukol ug gusto nang mosurender. Gikomentaryohan usab niya ang mahitungod sa kamatayon sa duha ka sibilyan nga nasaypang kauban sa mga rebelde nga napatay sa kasundalohan. -- Sumpayan pa